ԵՐԵՎԱՆ, 12 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Երեւանի Ալեքսանդր
Սպենդիարյանի անվան օպերայի եւ բալետի ազգային ակադեմիական թատրոնի
շենքում նոյեմբերի 10-ին անցկացվեց ձյուդոյի «Գրան պրի» միջազգային
մրցաշար, որին մասնակցեցին 11 երկրների ներկայացուցիչներ: Ծրագրում
ընդգրկված էր քաշային երեք կարգ` 8-ական մարզիկով: Հայաստանը
ներկայացրեց 6 ձյուդոիստ:
Մրցաշարի հաղթողներ դարձան Գրեգ Ֆալոն (60 կգ, Անգլիա), Միլոշ
Միխալկովիչը (66 կգ, Սերբիա) եւ Ռոման Կոնդյուկը (81 կգ,
Ուկրաինա): Նրանք եզրափակիչում հաղթեցին, համապատասխանաբար,
Հովհաննես Դավթյանին (Գյումրի), Արմեն Նազարյանին (Հրազդան) եւ
Դավիթ Կեխկիշվիլուն (Թբիլիսի):
Մրցաշարի հաղթողները արժանացան, համապատասխանաբար, 20, 6 եւ 2
հազար ԱՄՆ դոլարի դրամական պարգեւների: Ամենաարագ հաղթանակ տարած
Ռոման Կոնդյուկին (Ուկրաինա) հանձնվեց 10 հազար ԱՄՆ դոլար:
Միջոցառումը նվիրված էր Երեւանի Գինու, օղու եւ կոնյակի գործարանի
հիմնադրման 130-ամյակին: