ՍԵՐԲԻԱՆ ՊԱՀԱՆՋՈՒՄ Է «ՀՈՆԿՈՆԳՅԱՆ ՄՈԴԵԼԻ» ԿԻՐԱՌՈՒՄ ԿՈՍՈՎՈՅԻ
ՆԿԱՏՄԱՄԲ
08-11-2007 21:03:00 | | Միջազգային
ԲԵԼԳՐԱԴ, 8 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Քաղաքական այն մոդելը,
որ գտել է Չինաստանը Հոնկոնգի առնչությամբ, միանգամայն կիրառելի է
Կոսովոյի նկատմամբ: Սերբիան իր այս դիրքորոշման մասին տեղեկացրել է
միջազգային միջնորդներին, եւ պնդելու է դա: Այս մասին նոյեմբերի
8-ին Բելգրադում Իռլանդիայի ԱԳՆ ղեկավար Դերմոտ Ախերնի հետ
բանակցությունների ժամանակ հայտարարել է Սերբիայի կառավարության
ղեկավար Վոիսլավ Կոշտունիցան:
«Իր հետագա գործողություններում Սերբիան ակտիվորեն առաջ է
մղելու այդ որոշումը, քանի որ դրա իրականացումը կապահովի ինչպես իր
պետական շահերի, այնպես էլ ինքնավարության ալբանական ազգային
փոքրամասնության շահերի պաշտպանությունը»,- նշել է Կոշտունիցան:
Ախերնը իր հերթին ընդգծել է երկխոսությունը շարունակելու
կարեւորությունը, որը կողմերին կհասցներ կոսովյան խնդրի
փոխզիջումային լուծման: «Երկխոսությունը պետք չէ սահմանափակել
ժամանակային շրջանակներում, ավելի կարեւոր է գտնել լավագույն
լուծումը, որ կայունություն կապահովեր»,- ընդգծել է Իռլանդիայի
նախարարը: