ՀԱՅԱՍՏԱՆԻ ՖՈՆԴԱՅԻՆ ԲՈՐՍԱՅԻ ԵՎ ԴԵՊՈԶԻՏԱՐԻԱՅԻ ՎԱՃԱՌՔԻ
ՊԱՅՄԱՆԱԳԻՐԸ ԿՍՏՈՐԱԳՐՎԻ ՀՈԿՏԵՄԲԵՐԻ ՎԵՐՋԻՆ ԿԱՄ ՆՈՅԵՄԲԵՐԻ ՍԿԶԲԻՆ
10-10-2007 21:30:00 | Հայաստան | Տնտեսություն
ԵՐԵՎԱՆ, 10 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: «Արժեթղթերի շուկայի
մասին» օրենքի փոփոխությունը ՀՀ կառավարությանը կընձեռի
շվեդա-ֆիննական OMX AB ընկերության հետ Հայաստանի ֆոնդային բորսայի
եւ դեպոզիտարիայի վաճառքի պայմանագրի ստորագրման օրենսդրական
հնարավորություն: Հոկտեմբերի 10-ին Ազգային Ժողովում նշված
օրենքում փոփոխություն կատարելու օրինագծի եւ դրա հետ կապված
օրենսդրական փաթեթի քննարկման ավարտին այս մասին լրագրողներին
հայտարարեց ՀՀ Կենտրոնական բանկի նախագահ Տիգրան Սարգսյանը: Նա
հայտնեց, որ պայմանագիրը կստորագրվի հոկտեմբերի վերջին կամ
նոյեմբերի սկզբին` օրենքի ուժի մեջ մտնելուց անմիջապես հետո:
«Այսուհետեւ բորսայական բիզնեսի կառավարումը Հայաստանում
կիրականացվի շուկայական կանոններով: Դա նշանակում է, որ մենք
ճանապարհ ենք բացում օտարերկրյա ներդրողների համար, որպեսզի նրանք
կարողանան ներդրումներ կատարել եւ զարգացնել բորսան եւ
դեպոզիտարիան մեր հանրապետութությունում»,- ասաց ԿԲ-ի նախագահը:
Տ.Սարգսյանը միաժամանակ նշեց, որ կան բազմաթիվ նորմեր, որոնք
դեռեւս ներառված չեն օրենքում, բայց միջազգային պրակտիկայում
կիրառվում են: Նրա խոսքերով, փուլ առ փուլ բարեփոխվելու է
«Արժեթղթերի շուկայի մասին» օրենքը. հաջորդ տարի ներկայացվելու է
նոր օրենսդրական փաթեթ, շուկայի զարգացմանը զուգնթաց փորձ է
արվելու նոր մեխանիզմներ եւ սկզբունքներ կիրառել:
Նույն օրը ԱԺ-ն երկրորդ եւ երրորդ ընթերքմամբ քննարկեց նշված
օրենսդրական փաթեթը, որի ընդունումը կքվեարկվի մոտ ժամնակներս: