«ՀԱՅՓՈՍՏ»-Ի ԱՇԽԱՏԱԿԻՑՆԵՐԻՆ ԱՇԽԱՏԱՆՔԻՑ ԱԶԱՏԵԼԸ ՃԻՇՏ ՉԷ,-
ԳՏՆՈՒՄ Է ՀՀ ՏՐԱՆՍՊՈՐՏԻ ԵՎ ԿԱՊԻ ՆԱԽԱՐԱՐԸ
09-10-2007 17:35:00 | Հայաստան | Հասարակություն
ԵՐԵՎԱՆ, 9 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: «Պրոֆեսիոնալ մարդկանց,
ովքեր երկար տարիներ աշխատել են փոստի համակարգում եւ ունեն
աշխատանքի մեծ փորձ, չպետք է ազատել աշխատանքից: Իսկ եթե նրանք
սխալներ են թույլ տվել, ապա պետք է դրանք ուղղել, այլ ոչ թե
մարդկանց պատժել»,- Փոստի համաշխարհային օրվա` հոկտեմբերի 9-ի,
առթիվ կազմակերպած միջոցառման ժամանակ հայտարարեց ՀՀ տրանսպորտի եւ
կապի նախարար Անդրանիկ Մանուկյանը:
Նշենք, որ վերջին օրերին «Հայփոստ» ընկերության ավելի քան 170
աշխատակիցներ գործազուրկ են դարձել, քանի որ ընկերության
ղեկավարությունը չի երկարացրել նրանց աշխատանքային պայմանագրերի
ժամկետները: Նախարարը տեղյակ չէր, թե ինչ պատճառաբանությամբ են
նրանց ազատել աշխատանքից, սակայն ընկերության կառավարչից
պահանջելու է, որպեսզի ազատման վերաբերյալ պարզաբանումներ
ներակյացվեն:
Միջոցառմանը ներկա գտնվող «Հայփոստ»-ի տնօրենի տեղակալներ
Լառա Չոլակյանը եւ Քըրք Օդաբաշյանը հրաժարվեցին
մեկնաբանություններից:
Անդրադառնալով հոկտեմբերի 9-13-ին կազմակերպված ազգային
ֆիլատելիստական ցուցահանդեսին, Ա.Մանուկյանը նշեց, որ վերջին
տարիներին փորձ է արվում զարգացնել հայրենական ֆիլատելիան, քանի որ
նամականիշների միջոցով հնարավոր է լինում աշխարհին ներկայացնել
հայկական մշակույթը, բնությունը: