ԵՐԵՎԱՆՈՒՄ ԱՆՑԿԱՑՎՈՒՄ Է ՄԻՋԱԶԳԱՅԻՆ ԳԻՏԱԺՈՂՈՎ` ՆՎԻՐՎԱԾ
ԱԿԱԴԵՄԻԿՈՍ ՀՐԱՉՅԱ ԲՈՒՆԻԱԹՅԱՆԻ 100 ԱՄՅԱԿԻՆ
24-09-2007 20:30:00 | Հայաստան | Հասարակություն
ԵՐԵՎԱՆ, 24 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Սեպտեմբերի 24-ին
Երեւանում աշխատանքը սկսեց «Նեյրոքիմիայի եւ նեյրոիմունոլոգիայի
արդի հիմնահարցերը» թեմայով միջազգային գիտաժողովը, որը նվիրված է
ակադեմիկոս Հրաչյա Բունիաթյանի ծննդյան 100 ամյակին: Գիտաժողովին
մասնակցում են Գերմանիայի, Նորվեգիայի, ԱՄՆ-ի եւ Հայաստանի մոտ 100
մասնագետներ: Այն կազմակերպել են ՀՀ ԳԱԱ-ի Հ.Բունիաթյանի անվան
կենսաքիմիայի ինստիտուտը եւ Հայաստանի կենսաքիմիկոսների
ասոցիացիան:
Ինչպես նշեց ինստիտուտի պրոֆեսոր Գեւորգ Գեւորգյանը,
Հ.Բունիաթյանը կարեւոր ներդրում ունի հանրապետությունում երիտասարդ
գիտական կադրերի պատրաստման գործում, հանդիսանում է հայկական
կենսաքիմիական դպրոցի հիմնադիրը: Ըստ նրա, ակադեմիկոսի գրչին են
պատկանում ավելի քան 250 գիտական աշխատանք ու մենագրություն:
Նշվեց նաեւ, որ Հ.Բունիաթյանը երկար տարիներ ղեկավարել է
հանրապետության ֆիզիոլոգների, կենսաքիմիկոսների եւ դեղաբանների,
ինչպես նաեւ կենսաքիմիկոսների ընկերությունները: Նա ակտիվորեն
մասնակցել է միջազգային կենսաքիմիական մի շարք կոնգրեսների ու
գիտաժողովների, զեկուցումներով հանդես եկել արտասահմանյան բազմաթիվ
երկրների գիտական կենտրոններում, ընտրվել Գերմանիայի բնախույզների
Լեոպոլդինա ակադեմիայի անդամ: Աշխարհի 14 խոշոր գիտնականների
շարքում Հ.Բունիաթյանը ընտրվել էր նյարդաքիմիկոսների միջազգային
ընկերության խորհրդի անդամ: