ՌՈՄԱՆ ՍՅՈՒՐ ԻԶԵՐ, 10 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Ֆրանսիայում Հայաստանի տարվա ավարտական միջոցառումների շրջանակներում ՀՀ դեսպան Էդվարդ Նալբանդյանը եւ Ռոման սյուր Իզերի քաղաքապետ Անրի Բերտոլեն սեպտեմբերի 9-ին կատարել են «Հայաստանյան ճամփորդություններ» խորագիրը կրող լուսանկարների ցուցահանդեսի բացումը, որին հաջորդել է հայ երաժշտության համերգ: Ելույթ ունենալով քաղաքի Սեն Բեռնար մայր տաճարում կազմակերպված միջոցառմանը, Հայաստանի դեսպանը առանձնահատուկ գոհունակություն է հայտնել, որ ֆրանսիական բազմաթիվ քաղաքներ ոչ միայն առանձին միջոցառումներով ակտիվորեն մասնակցեցին Ֆրանսիայում Հայաստանի տարվան, այլեւ տեղական մակարդակով կազմակերպեցին Հայաստանի ամբողջական տարի: Ըստ ՀՀ ԱԳՆ Մամուլի եւ տեղեկատվության վարչությունից «ՆՈՅՅԱՆ ՏԱՊԱՆ»-ին տրամադրած հաղորդագրության, միջոցառմանը ներկա էին Դրոմի նահանգի պրեֆեկտը, Ռոն Ալպ շրջանի ղեկավարներ, հինգ հարյուրից ավելի հանդիսականներ:

---