ՍԿՍՎԵԼ ԵՆ ԵՂԵՌՆԻՑ ՓՐԿՎԱԾՆԵՐԻ ԺԱՌԱՆԳՆԵՐԻ ՆԵՐԿԱՅԱՑՈՒՑԻՉՆԵՐԻ
ԵՐՐՈՐԴ ՀԱՄԱԳՈՒՄԱՐԻ ՆԱԽԱՊԱՏՐԱՍՏԱԿԱՆ ԱՇԽԱՏԱՆՔՆԵՐԸ
10-08-2007 18:39:00 | Հայաստան | Հասարակություն
ԵՐԵՎԱՆ, 10 ՕԳՈՍՏՈՍԻ, ՆՈՅՅԱՆ ՏԱՊԱՆ: Օգոստոսի 10-ին ՀՀ
արտաքին գործերի նախարար Վարդան Օսկանյանն ընդունել է Եղեռնից
փրկվածների ժառանգների ներկայացուցիչների համագումարի
նախապատրաստման եւ անցկացման կազմակերպական կոմիտեի անդամ Կարեն
Միքայելյանին: Ինչպես նշված է ՀՀ ԱԳՆ Մամուլի եւ տեղեկատվության
վարչությունից «ՆՈՅՅԱՆ ՏԱՊԱՆ»-ին տրամադրած հաղորդագրությունում,
նախորդ երկու համագումարները կայացել են 1917 եւ 1918 թվականներին`
Երեւանում:
Ներկայացնելով երրորդ համագումարը հրավիրելու նշանակությունն
ու անհրաժեշտությունը համազգային խնդիրները միասնաբար առաջադրելու
եւ համատեղ ջանքերով լուծելու գործում, Կ.Միքայելյանը տեղեկացրել
է, որ արդեն կայացել են կազմակերպական մի քանի նիստեր, հրապարակվել
է լիազոր ներկայացուցչական մարմիններ հիմնելու մասին
Հայտարարությունը:
Կարեւորելով նախորդ երկու համագումարների ընդհատված
գործընթացները շարունակելու եւ երրորդ համագումարը հրավիրելու
նախաձեռնությունը, Վ.Օսկանյանը նշել է, որ նման ներկայացուցչական
համագումար հրավիրելու համար անհրաժեշտ է նախապատրաստական մեծ
աշխատանք կատարել Սփյուռքի հայ համայնքներում, հատկապես աշխարհիկ
ու հոգեւոր կազմակերպությունների հետ` նրանց հետ նախապես
քննարկելով համագումարի հրավիրելու հետ առնչվող բոլոր խնդիրները: