ԲԱՑՎԵՑ ՍԵՎԱՆԱ ԼՃԻ ԱՓԻՆ ԿԱՌՈՒՑՎԱԾ ՈՒԻՆԴՍԵՐՖԻՆԳԻ ԱԿՈՒՄԲԸ
23-07-2007 17:10:00 | Հայաստան | Սպորտ
ՍԵՎԱՆ, 23 ՀՈՒԼԻՍԻ, ՆՈՅՅԱՆ ՏԱՊԱՆ: ՀՀ նախագահ Ռոբերտ
Քոչարյանը հուլիսի 21-ին մասնակցեց «Հայաստան» համահայկական
հիմնադրամի միջոցներով Սեւանա լճի ափին կառուցված ուինդսերֆինգի
(ջրային մարզաձեւերի) ակումբի բացմանը: «Ունենալով այսպիսի հրաշք
լիճ եւ չզարգացնել այս մարզաձեւը ուղղակի հանցանք է»,- ասաց
նախագահը` հավելելով. «Կփորձենք բացի ուինդսերֆինգից ձեռք բերել
փոքր սպորտային առագաստանավեր, եւ ակումբը ընդհանրապես
առագաստանավային մարզաձեւերի զարգացման համար հենակետ կլինի»:
Ռ.Քոչարյանը համոզմունք հայտնեց, որ ակումբն անկասկած կարող է
գրավիչ լինել նաեւ զբոսաշրջիկների համար: Ըստ նախագահի, Սեւանա լճի
ափին մեկ-երկու տարի հետո կբացվեն մարզաձեւի եւս մեկ-երկու
կենտրոններ:
Ըստ «Հայաստան» համահայկական հիմնադրամի գործադիր տնօրեն Վահե
Աղաբեկյանի, կառույցը` ներառյալ կահավորանքը եւ մարզագույքը,
պահանջել է 250-260 մլն դրամի ներդրումներ եւ մոտ 7 ամսվա
աշխատանք: Նշվեց, որ աշխատանքները դեռեւս ավարտված չեն`
կառուցվելու են նաեւ բասկետբոլի եւ թենիսի խաղահրապարակներ, մի
քանի այլ շինություններ, ինչի շնորհիվ կառույցը կդառնա լիարժեք
մարզական համալիր:
ՀՀ սպորտի եւ երիտասարդության հարցերի նախարար Արմեն
Գրիգորյանը նշեց, որ նորակառույց բազան լիովին համապատասխանում է
միջազգային չափանիշներին. այստեղ կարող են անցկացվել միջազգային
մրցումներ, այդ թվում` Եվրոպայի եւ աշխարհի առաջնություններ: Իսկ
ակումբի տնօրեն Մհեր Թովմասյանը նշեց, որ ակումբում մարզումներ
կանցկացնեն ոչ միայն մարզիկները, այլ նաեւ բոլոր ցանկացողները: