ԻՍԼԱՄԱԲԱԴ, 11 ՀՈՒԼԻՍԻ, ՆՈՅՅԱՆ ՏԱՊԱՆ: Հուլիսի 11-ին
Պակիստանի կառավարական զորքերը գրոհայիններից ամբողջությամբ
ազատագրել են երկրի մայրաքաղաքում գտնվող Կարմիր մզկիթը:
Ինչպես հայտարարել է Պակիստանի Պաշտպանության
նախարարության ներկայացուցիչ գեներալ Վահիդ Արշադը, մզկիթի եւ
մեդրեսեի տարածքները ամբողջությամբ մաքրվել են ծայրահեղականներից:
Հիշեցնենք, որ Կարմիր մզկիթի գրոհը սկսվել էր հուլիսի 10-ին,
որի ժամանակ մեծ կորուստներ էր գրանցվել ինչպես գրոհայինների, այնպես
էլ զինվորականների կողմից: Սպանվել էր նաեւ իսլամիստների առաջնորդ
Աբդուլ Ռաշիդ Գազին:
Նշենք նաեւ, որ Կարմիր մզկիթը Պակիստանի ոստիկանության եւ
զորքերի կողմից հուլիսի 3-ին շրջափակվել էր իսլամիստ ուսանողների
եւ ներքին զորքերի ստորաբաժանման միջեւ տեղի ունեցած բախումից
հետո, ինչի հետեւանքով զոհվել էր 12 եւ վիրավորվել մոտ 150 մարդ: