«ՈՍԿԵ ԾԻՐԱՆ» ՄԻՋԱԶԳԱՅԻՆ ԿԻՆՈՓԱՌԱՏՈՆԸ ՇԱՐՈՒՆԱԿՈՒՄ Է
ԱՆԱԿՆԿԱԼՆԵՐԻ ՇԱՐՔԸ
04-07-2007 18:10:00 | Հայաստան | Մշակույթ
ԵՐԵՎԱՆ, 4 ՀՈՒԼԻՍԻ, ՆՈՅՅԱՆ ՏԱՊԱՆ: Հուլիսի 9-14-ը Երեւանում
անցկացվող «Ոսկե ծիրան» միջազգային 4-րդ կինոփառատոնի ամենասպասվող
եւ ամենավառ հյուրը` ֆրանսիացի հայտնի դերասանուհի Ժաննա Մոռոն, չի
կարող ժամանել Հայաստան` Ավինյոնի փառատոնին մասնակցելու պատճառով:
Սակայն, ինչպես հուլիսի 4-ի մամլո ասուլիսում հայտարարեց փառատոնի
տնօրեն Հարություն Խաչատրյանը, այդ բացը կլրացնեն ոչ պակաս հայտնի
եվրոպական ռեժիսորները եւ պրոդյուսերները:
Հ.Խաչատրյանի խոսքերով, այս տարի փառատոնի բացման
արարողությունը կկայանա Ազատության հրապարակում` հուլիսի 9-ի
երեկոյան, ինչին կհաջորդի Պաոլո եւ Վիտորիո Տավիանիների
«Արտույտների ագարակը» ֆիլմի ցուցադրությունը, որով էլ կազդարարվի
փառատոնի մեկնարկը: Ըստ Հ.Խաչատրյանի, բացման արարողությունը
Ազատության հրապարակում կազմակերպելու նպատակը կինոյի այդ հրաշալի
երեւանյան տոնին բոլոր ցանկացողներին մասնակցելու հնարավորություն
ընձեռելն է: Այդ օրվա համար հրապարակում կտեղադրվեն 1500 հոգու
համար նախատեսված նստարաններ: Բացի այդ, հրապարակում ամեն երեկո`
ժամը 10-12-ը կցուցադրվեն փառատոնին մասնակցող լավագույն ֆիլմերը:
Հ.Խաչատրյանը նշեց, որ այս տարի փառատոնի ծրագրում ներառված
բազմաթիվ նորություններից է երկու` FIPRESCI-ի (Կինոլրագրողների
միջազգային համադաշնության) եւ Եկեղեցիների միջազգային
կազմակերպության նոր հանձնաժողովների ստեղծումը: Բացի այդ, այս
տարի սահմանվել է նաեւ «Կենաց ծառ» մրցանակը. ծառի վրա կախված
ֆիլմերի անվանումներից որեւէ մեկը պատահական ընտրության սկզբունքով
կարժանանա դրամական պարգեւի` 500 հազար դրամ:
Փառատոնի տնօրենը հայտարարեց, որ այս տարի առաջին անգամ
դրամական պարգեւներ են սահմանված նաեւ միջազգային խաղարկային եւ
վավերագրական ֆիլմերի համար, համապատասխանաբար` 2 եւ 1 մլն դրամի
չափով: