ՄԱԴՐԻԴ, 21 ՄԱՅԻՍԻ, ՆՈՅՅԱՆ ՏԱՊԱՆ: Եվրամիությանը Թուրքիայի անդամակցությանը սատարող Իսպանիան, Իտալիան, Մեծ Բրիտանիան եւ ԱՄՆ-ը Ֆրանսիային կբացատրեն Թուրքիայի ռազմավարական նշանակությունը: Այսպիսի հայտարարություն է արել Իսպանիայի արտգործանախարության Եվրամիության հետ հարաբերությունների հարցերով պետական քարտուղար Ալբերտո Նավարոն` Ֆրանսիայի նորընտիր նախագահ Նիկոլա Սարկոզիի` Թուրքիայի ԵՄ անդամակցությանը խոչընդոտելու վերաբերյալ արված հայտարարությունների առնչությամբ: Ալբերտո Նավարոն կարծիք է հայտնել, թե օր-օրի էլ ավելի է եվրոպականացվում Թուրքիան. «Ֆրանսիան Եվրոպայի համար ունի կարեւոր նշանակություն, ինչի պատճառով պետք է հաշվի նստել նրա հետ: Սակայն Իսպանիան, Անգլիան, Իտալիան եւ ԱՄՆ-ը Ֆրանսիային կբացատրեն Թուրքիայի ռազմավարական նշանակությունն ու կարեւորությունը: Հուսով ենք, որ ժամանակի ընթացքում Սարկոզին կփոխի իր տեսակետը»,- ասել է նա: Նշենք, որ Իսպանիայի վարչապետ Ժոզե Լուիս Ռոդրիգես Զապատերոն մայիսի 31-ին Մադրիդում հանդիպելու է Ֆրանսիայի նախագահ Նիկոլա Սարկոզիի հետ:

---