ԲԱՔՎՈՒՄ ԱՆՑԿԱՑՎԵԼԻՔ ԸՄԲՇԱՄԱՐՏԻ ԱՇԽԱՐՀԻ ԱՌԱՋՆՈՒԹՅՈՒՆՈՒՄ
ՀԱՅԱՍՏԱՆԻ ՀԱՎԱՔԱԿԱՆՆԵՐԻ ՄԱՍՆԱԿՑՈՒԹՅԱՆ ՎԵՐԱԲԵՐՅԱԼ ՍՏՈՐԱԳՐՎԵԼ Է
ՔԱՌԱԿՈՂՄ ՊԱՅՄԱՆԱԳԻՐ
07-05-2007 17:08:00 | Հայաստան | Սպորտ
ԵՐԵՎԱՆ, 7 ՄԱՅԻՍԻ, ՆՈՅՅԱՆ ՏԱՊԱՆ: Հայաստանի մարզական
պատվիրակության մայիսի 4-6-ին Բաքու կատարած այցի ընթացքում
Միջազգային օլիմպիական կոմիտեի (ՄՕԿ), Ըմբշամարտի միջազգային
ֆեդերացիայի (ՖԻԼԱ) ներկայացուցիչների եւ Ադրբեջանի սպորտի
ղեկավարների հետ քննարկվել է Բաքվում սեպտեմբերին անցկացվելիք
աշխարհի առաջնությանը Հայաստանի ազատ եւ հունահռոմեական ըմբշամարտի
հավաքականների մասնակցության հարցը: Հայկական կողմը առաջադրել է մի
շարք հարցեր` կապված հայ մարզիկների մուտքի վիզաների, ՀՀ ազգային
դրոշը բարձրացնելու, օրհներգի կատարման, Հայաստանի հետ հեռախոսակապ
ստեղծելու եւ պատվիրակության անդամների անվտանգության ապահովման
հետ:
Ինչպես նշվեց մայիսի 7-ին ՀՀ Սպորտպետկոմում հրավիրված
ասուլիսում, ադրբեջանական կողմը համապատասխան երաշխիքներ է տվել:
Ստորագրվել է քառակողմ` Հայաստան-Ադրբեջան-ՄՕԿ-ՖԻԼԱ, պայմանագիր:
ՖԻԼԱ-ի նախագահ Ռաֆայել Մարտինետին խոստացել է, որ ամեն բանից
անկախ Հայաստանի ըմբիշներին կթույլատրեն մասնակցելու
նախաօլիմպիական վարկանիշային 3 մրցաշարերին:
Հիշեցնենք, որ հայկական պատվիրակության կազմում Բաքու էին
մեկնել ՀՀ Ֆիզկուլտուրայի եւ սպորտի պետական կոմիտեի նախագահի
տեղակալ, ՀԱՕԿ-ի գլխավոր քարտուղար Արմեն Գրիգորյանը, ՀԱՕԿ-ի
փոխնախագահ Ռազմիկ Ստեփանյանը, Հայաստանի ըմբշամարտի ֆեդերացիայի
փոխնախագահ, օլիմպիական չեմպիոն Լեւոն Ջուլֆալակյանը: