ԵՐԵՎԱՆ, 4 ԱՊՐԻԼԻ, ՆՈՅՅԱՆ ՏԱՊԱՆ: ՀՀ Կենտրոնական բանկի նախագահ Տիգրան Սարգսյանին չի անհանգստացնում այն հանգամանքը, որ Fitch Ratings ընկերության զեկույցի համաձայն, Հայաստանն աշխարհում վերջին տեղն է գրավում վարկավորման եւ ՀՆԱ-ի ծավալների հարաբերակցության ցուցանիշով: Պատասխանելով «ՆՈՅՅԱՆ ՏԱՊԱՆ»-ի թղթակցի հարցին, նա նշեց, որ «կարեւոր է վարկերի որակը, այլ ոչ թե քանակը»: ՀՀ ԿԲ-ի նախագահի խոսքերով, Հայաստանի բանկային համակարգում տրամադրվող վարկերի որակը շատ ավելի բարձր է, քան, մասնավորապես, «հարեւան պետություններում, քանի որ վարկերի դասակարգման հանդեպ մեր մոտեցումները շատ ավելի խիստ են»: Տ.Սարգսյանի գնահատմամբ, «եթե վարկավորման մեր կանոնները ներդրվեն հարեւան պետություններում, ապա նրանց վարկային ներդրումների ծավալը կտրուկ կնվազի»: Եվ հակառակը, «եթե մենք փոխենք վարկային ներդրումների հաշվառման մեթոդները եւ կիրառենք այն մեթոդները, որոնք կիրառվում են հարեւան երկրներում, ապա մեր մոտ վարկերի ծավալը կարող է կտրուկ աճել: Բայց մենք գիտակցաբար չենք գնում այդ ճանապարհով»: Նշենք, որ 2006թ.-ին վարկավորման ծավալ/ՀՆԱ հարաբերակցությունը Հայաստանում կազմել է 9,2%, Ադրբեջանում`12,4%, Վրաստանում` 20,6%:

---