ՀԱՅԱՍՏԱՆՈՒՄ ՄՇԱԿՎՈՒՄ Է ԶԲԱՂՎԱԾՈՒԹՅԱՆ ՈԼՈՐՏԻ ԱԶԳԱՅԻՆ
ՌԱԶՄԱՎԱՐԱԿԱՆ ԾՐԱԳԻՐ
04-04-2007 15:08:00 | Հայաստան | Հասարակություն
ԵՐԵՎԱՆ, 4 ԱՊՐԻԼԻ, ՆՈՅՅԱՆ ՏԱՊԱՆ: Ապրիլի 4-ին Երեւանում
անցկացվեց «Սոցիալական գործընկերությունը Հայաստանում» թեմայով
մեկօրյա սեմինար` նվիրված «Զբաղվածության պետական ծառայություն»
գործակալության 15-ամյակին: Ինչպես նշեց գործակալության պետ Սոնա
Հարությունյանը, 2006թ.-ի հունվարից գործող «Բնակչության
զբաղվածության եւ գործազրկության դեպքում սոցիալական պաշտպանության
մասին» օրենքը էական դերակատարում է ունեցել զբաղվածության
ոլորտում բարեփոխումների իրականացման գործում: Նա հայտնեց, որ
ներկայումս մշակվում է զբաղվածության ոլորտի ազգային ռազմավարական
ծրագիր, որը ՀՀ կառավարության հաստատմանը կներկայացվի 2008թ.-ին:
Գործակալության Աշխատաշուկայի վերլուծության եւ կանխատեսման
բաժնի պետ Անահիտ Փարսադանյանը նշեց, որ մարտի 1-ի դրությամբ
հանրապետությունում գործազրկության մակարդակը կազմել է 7,2%, ինչը
նախորդ տարվա նույն օրվա համեմատ նվազել է 5%-ով: Ըստ նրա, նույն
ամսին գործակալությունում հաշվառված են 102,6 հազար աշխատանք
փնտրողներ, իսկ ամսվա ընթացքում գործատուների կողմից ներկայացվել է
թափուր աշխատանքի 1400 տեղ` հիմնականում բանվորական
մասնագիտությունների գծով: Հունվար-փետրվարին աշխատանքի է
տեղավորվել 650 գործազուրկ, որոնցից 56%-ը` կանայք են: