ՀԱՅԱՍՏԱՆՈՒՄ ՍՈՑԻԱԼԱԿԱՆ ԱՇԽԱՏԱՆՔԻ ԻՆՍՏԻՏՈՒՏԸ ԿԱՅՈՒՆ ՀԻՄՔԵՐԻ
ՎՐԱ Է,- ԱՍՈՒՄ Է ՍՈՑԱՊՆԱԽԱՐԱՐԸ
29-03-2007 15:30:00 | Հայաստան | Հասարակություն
ԵՐԵՎԱՆ, 29 ՄԱՐՏԻ, ՆՈՅՅԱՆ ՏԱՊԱՆ: Սոցիալական աշխատանքի
ինստիտուտը Հայաստանում կայուն հիմքերի վրա է: Այս մասին
«Հայաստանում սոցիալական աշխատանքի ինստիտուտի կայացումը.
ձեռքբերումներ եւ հիմնախնդիրներ» խորագրով մարտի 29-ի գիտաժողովի
ժամանակ հայտարարե ՀՀ աշխատանքի եւ սոցիալական հարցերի նախարար
Աղվան Վարդանյանը: Նա նշեց, որ 1993թ.-ին երկրում տիրող սոցիալական
լարվածության պայմաններում ստեղծվեց սոցիալական ծառայությունների
համակարգը, որը պետք է կազմակերպեր մարդասիրական օգնության
հասցեագրված բաշխման աշխատանքները:
Ա.Վարդանյանի դիտարկմամբ, ժամանակի ընթացքում փոփոխվում են
սոցիալական աշխատողի գործառույթները` դրանք համապատասխանեցնելով
բնակչության կարիքներին ու երկրի սոցիալ-տնտեսական զարգացման
ընթացքին: Նախարարը կարեւորեց 2006թ.-ից գործող «Սոցիալական
աջակցության մասին» ՀՀ օրենքը, որում առկա է «Սոցիալական աշխատանք
եւ սոցիալական աշխատանքի մասնագետներ» բաժինը: «Օրենքով
նախատեսվում է նաեւ սոցիալական աշխատանքի մասնագետների էթիկայի
կանոնների, տնային այցելություն կատարելու մեթոդական ցուցումների
մշակումը եւ հաստատումը»,- հայտնեց նա:
Միաժամանակ Ա.Վարդանյանը նշեց, որ այս ոլորտում առկա են նաեւ
խնդիրներ: Դրանք են, մասնավորապես, սոցիալական աշխատանքի
չափորոշիչների մշակում, սոցիալական աշխատողների շարունակական
վերապատրաստում ու մասնագիտական որակավորման բարձրացում: Նախարարը
հույս հայտնեց, որ գիտաժողովի ընթացքում ներկայացվող եւ քննարկվող
թեմաները կնպաստեն բնակչության տարբեր խմբերին մատուցվող
սոցիալական ծառայությունների որակի բարելավմանը, ինչպես նաեւ հիմք
կծառայեն պետական քաղաքականության մշակման համար: