«ՈՍԿԵ ԾԻՐԱՆ» ՄԻՋԱԶԳԱՅԻՆ 4-ՐԴ ԿԻՆՈՓԱՌԱՏՈՆԻՆ ՄԱՍՆԱԿՑԵԼՈՒ ՀԱՅՏ
Է ՆԵՐԿԱՅԱՎԵԼ 75 ՖԻԼՄԻ ՀԱՄԱՐ
20-02-2007 19:00:00 | Հայաստան | Մշակույթ
ԵՐԵՎԱՆ, 20 ՓԵՏՐՎԱՐԻ, ՆՈՅՅԱՆ ՏԱՊԱՆ: «Ոսկե ծիրան» միջազգային
4-րդ փառատոնի կազմկոմիտեն արդեն ստացել է 75 ֆիլմեր ցուցադրելու
հայտ: Ֆիլմերի հոսքը շարունակվում է, եւ առաջիկայում մասնագիտական
հանձնախումբը կսկսի դրանց ընտրությունը: Ինչպես փետրվարի 20-ին
ասուլիսում հայտարարեց փառատոնի ծրագրերի տնօրեն, արվեստաբան
Միքայել Ստամբոլցյանը, գրեթե ձեւավորված են երեք` խաղարկային,
վավերագրական, «Հայկական համայնապատկեր» մրցութային ծրագրերի
ժյուրիների կազմերը:
Բացի այդ, Մ.Ստամբոլցյանը հայտնեց, որ «Ոսկե ծիրան»
կինոփառատոնը այս տարի առաջին անգամ կունենա նաեւ Կինոքննադատների
եւ կինոլրագրողների միջազգային ասոցիացիայի եւ Էկումենիկ
(եկեղեցական) մրցութային ժյուրիներ: Այս երկու նոր մրցութային
հանձնախմբերի ստեղծման որոշումը կայացրել է Ռոտերդամի 36-րդ
միջազգային կինոփառատոնի կազմակոմիտեն, որի անդամ է նաեւ երեւանյան
«Ոսկե ծիրանը»:
Տեղեկացնելով, որ այս տարի չի հաջողվել մեկնել Իրան եւ
երեւանյան փառատոնի համար ֆիլմեր ընտրել, Մ.Ստաբոլցյանը հույս
հայտնեց, որ առաջիկայում այդ հարցը եւս կլուծվի: