ԵՐԵՎԱՆ, 23 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Հայաստանում այսօր գործում է աշխատանքային շահագործման սկզբունքը: Այսպիսի հայտարարություն արեց ՀՀ Մարդու իրավունքների պաշտպան Արմեն Հարությունյանը աշխատանքային շահագործման, մենաշնորհների եւ շրջակա միջավայրի պահպանության խնդիրներին նվիրված հոկտեմբերի 23-ի ասուլիսում: «Այն մարդկանց համար, ովքեր քաղաքացուն դիտարկում են որպես նրա իրավունքների խախտմամբ գերշահույթ ստանալու միջոց, պետությունը եւս գերշահույթ ստանալու միջոց է դառնում»,- հայտարարեց Պաշտպանը: Որպես օրինակ, Ա.Հարությունյանը տեղեկացրեց, որ իր դիմումի հիման վրա Աշխատանքի պետական տեսչությունը ստուգումներ է անցկացվել երթուղային տաքսիների վարորդների իրավունքների հնարավոր խախտումների վերաբերյալ տեղեկություններ ստանալու համար: Ստուգումներով, որ կատարվել են 70 կազմակերպություններից միայն 5-ում, պարզվել է, որ վարորդներին շահագործել են արտաժամյա` 18 ժամ, աշխատեցրել են առանց վճարելու. ընդհանուր առմամբ, չի վճարվել 144 մլն դրամ (մոտ 374 հազար ԱՄՆ դոլար), որի մեջ մտնում է աշխատավարձը, սոցվճարները, պետական բյուջե գանձվող եկամտահարկի գումարը: Ստուգումները ցույց են տվել նաեւ, որ բացակայում է բժշկական հսկողությունը: Պարզվել է նաեւ, որ կազմակերպություններից մեկում 24 վարորդներից միայն 4-ն ունեն պատշաճ փաստաթղթեր, իսկ կազմակերպություններից մեկն էլ շուրջ մեկ տարի գործում է առանց արտոնագրի: Արդյունքում ոչ միայն խախտվել է վարորդների աշխատանքային իրավունքը, այլեւ չի ապահովվել ուղեւորների անվտանգությունը,- ասաց Ա.Հարությունյանը: Նա հույս հայտնեց, որ Աշխատանքի պետական տեսչությունը ուսումնասիրություններ կանցկացնի տվյալ բնագավառում գործող ավելի խոշոր ընկերություններում անկախ այն բանից, թե ով է դրանց սեփականատերը, կամ ով է նրանց թիկունքում կանգնած:

---