Առաջին անգամ ՏՏ ոլորտում նախագահական մրցանակներ հանձնվեցին
սփյուռքահայ ուսանողներին
02-10-2009 18:30:00 | Հայաստան | Հասարակություն
ԵՐԵՎԱՆ, 2 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: ՀՀ սփյուռքի նախարար
Հրանուշ Հակոբյանի նախաձեռնությամբ 2009 թվականից ՀՀ նախագահի ՏՏ
ոլորտի կրթական ամենամյա մրցանակաբաշխությունը ներառեց լավագույն
սփյուռքահայ ուսանող անվանակարգը: Առաջինը մրցանակների արժանացան
Երեւանի պետական համալսարանի իրանահայ ուսանող Արադա Մալեկյանը
(1-ին կարգ) եւ Հայաստանի պետական ճարտարագիտական համալսարանի
իրաքահայ ուսանողուհի Վարթան Մարալ Գնունին (2-րդ կարգ):
Նրանք 5-րդ մրցանակաբաշխության հաղթող 23 ուսանողների եւ 7
աշակերտների թվում էին: Օրերս ՀՀ նախագահի նստավայրում անցկացված
պարգեւատրման արարողությանը սփյուռքահայ ուսանողներին կրթական
պարգեւների շնորհումը կարեւորելով` ՀՀ Սփյուռքի նախարար Հրանուշ
Հակոբյանն ընդգծեց. «ՀՀ բնական ռեսուրսը ոչ միայն Հայաստանի, այլեւ
Սփյուռքի մարդիկ են, որովհետեւ հայ ժողովուրդն է ամբողջությամբ
հանդիսանում ազատ երկրի տերը, եւ ամբողջ հայ ժողովրդի գիտելիքները,
փորձը, կարողությունը պետք օգտագործենք Հայաստանը զորացնելու,
զարգացնելու համար»: «Լավագույն սփյուռքահայ ուսանող»
անվանակարգում 1-ին կարգի մրցանակակիր Արադա Մալեկյանն իր գիտական
ապագան տեսնում է Հայաստանում եւ ցանկանում ինչ-որ չափով ներդրում
ունենալ Հայրենիքում գիտության զարգացման մեջ:
ՏՏ ոլորտի լավագույն ուսանողներին եւ աշակերտներին ՀՀ
նախագահի ամենամյա կրթական պարգեւները շնորհվում են ըստ 2005թ.
ապրիլին, ՀՀ նախկին նախագահ Ռոբերտ Քոչարյանի հավանությամբ,
«Սինոփսիս Արմենիա» ՓԲԸ-ի եւ «Հայաստան» համահայկական հիմնադրամի
ստորագրած համաձայնագրի: Արարողության ժամանակ «Սինոփսիս»-ի
կորպորատիվ մարքեթինգի եւ ստրատեգիական շուկաների զարգացման գծով
փոխնախագահ, «Սինոփսիս Արմենիա»-ի գլխավոր գործադիր տնօրեն Ռիչ
Գոլդմանը նշեց, որ ՏՏ ոլորտում աչքի ընկած ուսանողները լինելու են
Հայաստանի առաջընթացի իրական առաջնորդները: Նրա խոսքերով, «մենք
պետք է Հայաստանում զարգացնենք հոյակապ ինժեներական ապագա եւ
երկիրը կապենք մնացյալ աշխարհին համացանցի եւ տեղեկատվական
տեխնոլոգիաների միջոցով»: Իսկ ընկերության գործադիր տնօրեն Հովիկ
Մուսայելյանն ասաց. «Ըստ էության, մենք ստեղծում ենք մեր ապագա
տնտեսական, գիտակրթական, ինչու չէ` նաեւ քաղաքական գենոֆոնդը»:
ՀՀ նախագահի ամենամյա կրթական մրցանակաբաշխությունը
ֆինանսավորվում է «Սինոփսիս Արմենիա»-ի կողմից:
Մրցանակաբաշխությունն առաջին անգամ անցկացվել է 2005թ, պարգեւ է
շնորհվել ՏՏ ոլորտի 18 լավագույն ուսանողի եւ աշակերտի: 2006թ.
նախագահական կրթական պարգեւի է արժանացել 19 ուսանող եւ աշակերտ:
2007թ. ՀՀ նախագահի ամենամյա կրթական պարգեւների շնորհման
հանձնաժողովը իր ընտրությունը կատարել է 148 թեկնածուից: Մրցանակ է
ստացել են 27 ուսանող եւ աշակերտ, իսկ 2008թ.` 29 ուսանող եւ
աշակերտ` 134 թեկնածուից: 2009թ. հաղթող 23 ուսանող եւ 7 աշակերտն
ընտրվել են Հայաստանի պետական ճարտարագիտական համալսարանի, Երեւանի
պետական համալսարանի, Հայաստանի ամերիկյան համալսարանի
ճարտարագիտության ֆակուլտետի, Եվրոպական տարածաշրջանային
ուսումնական ակադեմիայի, Ռուս-հայկական (սլավոնական) համալսարանի
50, ինչպես նաեւ Ա. Շահինյանի անվ. ֆիզիկա-մաթեմատիկական
մասնագիտացած կրթահամալիրից, «Քվանտ», Անանիա Շիրակացու, ՀՊՃՀ-ի
հենակետային վարժարաններից, Գյումրու «Ֆոտոն» եւ Վանաձորի «Էվրիկա»
քոլեջների 60 թեկնածուներից:
Պարգեւների հանձնման արարողությունից հետո մրցանակակիրներին,
«Սինոփսիսի» եւ «Սինոփսիս Արմենիա»-ի ղեկավարությանն ընդունել է ՀՀ
նախագահ Սերժ Սարգսյանը: ՀՀ նախագահը Ռիչ Գոլդմանին պարգեւատրել է
հատուկ մրցանակով` ՏՏ ոլորտում լավագույն ուսանողներին շնորհվող
ամենամյա կրթական պարգեւների մրցանակաբաշխության կայացման գործում
նշանակալի ավանդի համար:
Նշված մրցանակաբաշխությունը «Սինոփսիսի» շաբաթը Հայաստանում»
ավանդական միջոցառումների շարքի (սեպտեմբերի 28-հոկտեմբերի 2) մասն
է: Դրանց թվում էին նաեւ Միկրոէլեկտրոնիկայի հայաստանյան
օլիմպիադայի եզրափակիչը, մրցանակաբաշխության եւ օլիմպիադայի
հաղթողների ընդունելությունը, «Սինոփսիսի» համալսարանական ծրագրերի
շրջանավարտներին վկայականների հանձնման արարողությունները,
«Սինոփսիսի» նախագահ եւ գլխավոր գործառնական տնօրեն Չի-Ֆուն Չանի
ու Ռ.Գոլդմանի դասախոսությունները համալսարաններում եւ «Դիջիթեք»
ցուցահանդեսում:
«Սինոփսիս» ընկերությունը էլեկտրոնային նախագծման
ավտոմատացման ոլորտի համաշխարհային առաջատարն է, որը շուկային
մատակարարում է կիսահաղորդիչների նախագծման, ստուգման եւ
արտադրության համար անհրաժեշտ ծրագրային միջոցներ, մտավոր
սեփականություն եւ ծառայություններ: «Սինոփսիս»-ը Հայաստանում
գործունեությունը սկսել է 2004 թվականին: «Սինոփսիս Արմենիա» ՓԲԸ-ն
«Սինոփսիսի» կարեւորագույն մասնաճյուղերց մեկն է եւ ունի 400-ից
ավելի ճարտարագետ-աշխատակից: