2009թ.-ի 8 ամիսներին նախորդ տարվա նույն ժամանակահատվածի
համեմատ Երեւանում 59,9 տոկոսով աճել են հանցագործության դեպքերը
02-10-2009 16:26:00 | Հայաստան | Հասարակություն
ԵՐԵՎԱՆ, 2 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: 2009թ.-ի առաջին 8 ամսվա
ընթացքում Երեւանում գրանցվել է 4696 հանցագործություն, ինչ 1760
դեպքով կամ 59,9 տոկոսով ավելի է նախորդ տարվա նույն
ժամանակահատվածի ցուցանիշից: Այս մասին լրագրողների հետ հոկտեմբերի
2-ի հանդիպմանը հայտնեց ՀՀ Ոստիկանության Երեւանի վարչության պետ,
գեներալ-մայոր Ներսես Նազարյանը:
Մայրաքաղաքում գրանցված դեպքերը կազմել են հանրապետությունում
կատարված հանցագործությունների 49,8 տոկոսը` նախորդ տարվա 50,4-ի
դիմաց, իսկ հանցավորության ինդեքսը յուրաքանչյուր 10 հազար բնակչի
հաշվարկով կազմել է 42,6` հանրապետական 29,3-ի դիմաց:
Հանցագործությունների աճը տեղի է ունեցել հիմնականում
սեփականության դեմ ուղղված հանցագործությունների հաշվին, որոնց
թիվն ավելացել է 836-ով, այդ թվում` 674-ով աճել են անձնական
գույքի գողությունները, 62-ով` բնակարանային գողությունները,
10-ով` կողոպուտները: Աճել են նաեւ անձի դեմ ուղղված
հանցագործությունները` 423-ով կամ 126 տոկոսով, այդ թվում`
մարմնական վնասվածքներ հասցնելու դեպքերը` 159-ով: Երեւանի
համայնքներից հանցագործությունների թվով «աչքի է ընկել» Կենտրոնը,
որտեղ 550-ով աճել են հանցագործությունների դեպքերը` կողոպուտներ,
գողություններ, մարմնական վնասվածքներ հասցնելու դեպքեր: Կենտրոնից
շատ ետ չի մնում նաեւ Արաբկիրի համայնքը:
Ըստ Ն.Նազարյանի, 8 ամիսների ընթացքում հայտնաբերված
թմրանյութերի ապօրինի շրջանառության դեպքերը ավելացել են 209-ով,
իսկ իրացման փաստերը` 108-ով: Մասնավորապես, թմրանյութ պահելու եւ
իրացնելու կասկածանքով Երեւանի վարչություն են բերման ենթարկվել
Իրանի Իսլամական Հանրապետության քաղաքացիներ, որոնց բնակարանների
խուզարկությամբ հայտնաբերվել են 302 գ ափիոն եւ 110 գ հաշիշ տեսակի
թմրամիջոցներ: Ն.Նազարյանը անհանգստացնող համարեց Երեւանի
գիշերային ակումբներում թմրամիջոցների տարածման փաստերը:
Ըստ նրա, 23-ով կամ 60,5 տոկոսով աճել է զենք-զինամթերքի
առգրավման փաստերով հարուցված քրեական գործերի թիվը: Հրազենով
կատարված հանցագործությունների թիվը աճել է 8-ով: Առգրավվել կամ
հանձնվել է բնակչության մոտ ապօրինաբար պահվող 267 միավոր հրազեն,
այդ թվում` 41 ինքնաձիգ, 54 հրացան, 136 ատրճանակ, 3 գնդացիր եւ
այլն:
243 դեպքով կամ 179 տոկոսով աճել են տնտեսական գործունեության
դեմ ուղղված հանցագործությունների հայտնաբերման դեպքերը:
Վարույթում գտնվող գործերով բացահայտումը աճել է ինչպես բոլոր
հանցատեսակներով, այնպես էլ հետախուզության գծով: Աճել են ինչպես
ծանր, այնպես էլ առանձնապես ծանր հանցագործությունների բացահայտման
ցուցանիշները, կազմելով 60,6 եւ 67,3 տոկոս: Դիտավորյալ
սպանությունների բացահայտումը աճել է 23,4 տոկոսով եւ կազմել 68,4
տոկոս` նախորդ տարվա 8 ամիսների 45 տոկոսի դիմացղ
Երեւանում գրանցվել է ավազակության դեպքերի նվազում. 8
ամիսների ընթացքում բացահայտվել է 26 դեպք, չբացահայտված է մնացել
32-ը, բացահայտման ցուցանիշը նվազել է եւ կազմել 44,8 տոկոս:
Առավել հնչեղություն ստացած գործերից է հուլիսի 22-ին
«ՎՏԲ-Հայաստան» բանկի Արաբկիրի մասնաճյուղում Վրաստանի 3
քաղաքացիների կողմից կատարված ավազակային հարձակումը, որը հաջորդ
օրն իսկ բացահայտվել է: Հետագայում տեղեկություններ են ստացվել, որ
նշված հանցախմբի կողմից ՀՀ տարածքում կատարվել են նաեւ մի շարք
բնակարանային գողություններ: Եւս 13 հանցախմբեր կատարել են 56
կողոպուտներ, իսկ մեկ հանցավոր խումբ` շուրջ 140 բնակարանային
գողություններ: Այդ հանցավոր խմբերը ձերբակալված են:
Հասարակական վայրերում կատարվող հանցագործությունները աճել են
23-ով, ոստիկանության բաժիններ բերման է ենթարկվել 1109 քաղաքացի,
որից 380-ը` հանցագործության կասկածանքով եւ 729-ը` վարչական
իրավախախտումների համար:
2009թ.-ի առաջին 8 ամիսների տվյալներով, 48 դեպքով կամ 38,7
տոկոսով նվազել են անչափահասների կողմից կատարված
հանցագործությունները, իսկ նախկինում դատված անձանց կողմից
կատարված հանցագործությունները աճել են 312-ով:
Նույն ժամանակահատվածում հայտնաբերվել է հետախուզման մեջ
գտնվող 542 հանցագործ, կամ 77-ով ավելի նախորդ տարվա նույն
ժամանակահատվածի ցուցանիշից: