Հարուցվել է քրեական գործ սահմանային հսկիչ կետերի կառուցման
աշխատանքներն իրականացնելիս հավելագրումներ կատարելու դեպքի առթիվ
28-09-2009 18:42:00 | Հայաստան | Հասարակություն
ԵՐԵՎԱՆ, 28 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: ՀՀ Գլխավոր
դատախազության Պետական շահերի պաշտպանության վարչությունում
հարուցվել է քրեական գործ` Գյուղատնտեսության նախարարության
անասնաբուժական եւ բույսերի կարանտինի Բագրատաշենի եւ Բավրայի
սահմանային հսկիչ կետերի կառուցման աշխատանքներն իրականացնելիս
հավելագրումներ կատարելու եւ պետությանը ավելի քան 22,5 մլն դրամի
վնաս պատճառելու դեպքի առթիվ:
Ըստ ՀՀ Գլխավոր դատախազության մամուլի ծառայության
հաղորդագրության, Գյուղատնտեսության նախարարությունից ստացված
նյութերի ուսումնասիրությամբ պարզվել է, որ նշված սահմանային հսկիչ
կետերի կառուցման աշխատանքների կատարումն ստանձնել է «ՎԼՀԱՔ» ՍՊ
ընկերությունը, որը ստացել է 2005թ. սեպտեմբերի 13-ի պայմանագրերով
նախատեսված 185 մլն 540 հազար 780 դրամ գումարը:
Ընկերության տնօրեն Հ.Քեթցյանը 2008թ.-ի հունվարի 26-ի
կատարողական ակտերում կեղծ տվյալներ ներառելու միջոցով հավելագրել
է փաստացի չկատարված 22 մլն 549 հազար 280 դրամի աշխատանքներ եւ
հսկիչ կետերի կառուցման աշխատանքների նկատմամբ տեխնիկական
հսկողություն իրականացնող «Միրզոյան եւ որդիներ» ՍՊ ընկերության
աշխատակից Ս.Թովմասյանի օժանդակությամբ խաբեությամբ հափշտակել է
պետության առանձնապես խոշոր չափերի դրամական միջոցները:
Բույսերի կարանտինի եւ երկրագործության պետական տեսչության
պետ Վ.Գյուլզադյանը, հանդիսանալով վերը նշված պայմանագրերի
կատարման նկատմամբ հսկողություն իրականացնող պաշտոնատար անձ,
պաշտոնեական դիրքն օգտագործել է ծառայության շահերին հակառակ եւ
ստորագրել փաստացի չկատարված աշխատանքների հավելագրումներով
կատարողական ակտերը: Այդպիսով պետությանը պատճառվել է 22 մլն 549
հազ. 280 դրամի էական նյութական վնաս: