Ռոստովյան թատրոնը բուլղարներին ցուցադրել է «Տիգրան Մեծը»
18-08-2009 16:30:00 | Ռուսաստան | Մշակույթ
ԴՈՆԻ ՌՈՍՏՈՎ, 18 ՕԳՈՍՏՈՍԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ:
Անցած շաբաթ Դոնի Ռոստով քաղաքի Գորկու անվան դրամատիկական թատրոնը
վերադարձավ Բուլղարիայից: Ռոստովցիները Պլեւեն քույր քաղաքում
ցուցադրեցին երեք կատակերգություն: Ինչպես հաղորդում է Ռուսաստանի
հայերի «Երկրամաս» թերթը, բուլղար բարեկամները ներկայացումներից
հետո ռոստովյան թատրոնին պարգեւեցին ուղեւորություն դեպի Վելիկո
Տըռնովո: «Պատմական այդ դեկորացիաներով մենք կարողացանք խաղալ
միանգամից երեք ներկայացում մեր խաղացանկից` «Ռոմեո եւ Ջուլետ»,
«Թագուհին» եւ իհարկե «Տիգրան Մեծը»,- նշեց Գորկու թատրոնի
գեղարվեստական ղեկավար Նիկոլայ Սորոկինը:
Թերթը նշում է, որ «Տիգրան Մեծ» ներկայացման պրեմիերան
Ռուսաստանի ժողովրդական արտիստ Նիկոլայ Սորոկինի բեմադրությամբ
ռոստովյան թատրոնում կայացել է դեռեւս 2008 թվականի հոկտեմբերի
26-ին: Համարձակվելով բեմական լեզվի փոխադրել Արա Գեւորգյանի
«Տիգրան Մեծ» պատմական դրաման, ռոստովյան թատրոնը որոշել է
ժամանակակիցներին պատմել 2000-ամյա վաղեմության ողբերգություն:
Պրեմիերայից հետո անցած ժամանակամիջոցում Գորկու անվան
դրամատիկական թատրոնը այդ ներկայացմամբ հմայել է իր
հանդիսականներին ոչ միայն Դոնի Ռոստովում, այլեւ Ռուսաստանի տարբեր
մարզերում հյուրախաղերի ընթացքում: