«Մենք երջանիկ ենք, որ ունենք ծննդավայր Վրաստան եւ հայրենիք
Հայաստան»,- ասում է Թբիլիսիի հայկական թատրոնի ղեկավարը
29-07-2009 20:18:00 | Հայաստան | Մշակույթ
ԵՐԵՎԱՆ, 29 ՀՈՒԼԻՍԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ: Հուլիսի
31-ին կավարտվեն Թբիլիսիի Պետրոս Ադամյանի անվան հայկական
դրամատիկական թատրոնի հյուրախաղերը Երեւանում: Այս անգամ
ադամյանցիները երեւանյան հանդիսատեսին ներկայացրին Սայաթ-Նովայի
ստեղծագործությունների մոտիվներով արված «Աշխարհումըս իմըն դուն
իս», Գ.Սունդուկյանի «Խաթաբալա», Հ.Պարոնյանի «Պաղտասար Ախպար»,
Գ.Խանջյանի «Ավերակների պահակները» եւ Ռ.Կունիի «Փախիր կնոջիցդ»
բեմադրությունները:
«Մենք երջանիկ ենք, որ ունենք ծննդավայր Վրաստան եւ հայրենիք
Հայաստան»,- հուլիսի 29-ի ասուլիսում հայտարարեց թատրոնի
գեղարվեստական ղեկավար Արմեն Բայանդուրյանը: Նա նշեց, որ
հյուրախաղերի կազմակերպման հարցում համագործակցել են Հայաստանի եւ
Վրաստանի մշակույթի նախարարությունները, աջակցել է նաեւ ՀՀ
Սփյուռքի նախարարությունը: Ըստ Ա.Բայանդուրյանի, 153-ամյա թատրոնի
կյանքում սկսվել է նոր փուլ. երիտասարդների նոր սերունդ է եկել
թատրոն, որն իր հետ բերել է նաեւ երիտասարդ հանդիսատես:
Անդրադառնալով թատրոնի խնդիրներին, գեղարվեստական ղեկավարը
նշեց, որ լավ կլիներ, եթե թատրոնի դերասաններին շնորհվեին
Հայաստանի Հանրապետության պատվավոր կոչումներ, քանի որ ներկայումս
Վրաստանը չունի այդ կոչումները, իսկ Թբիլիսիի հայկական թատրոնը
ծառայում է հայ գրականության եւ հայ լեզվի պահպանմանը: Ի դեպ,
ԽՍՀՄ-ի օրոք Թբիլիսիի հայկական թարոնի անվանի շատ դերասաններ
արժանացել են նաեւ ՀՀ ժողովրդական կամ վաստակավոր արտիստի կոչման:
Մեկ այլ խնդրի անդրադարձավ թատրոնի տնօրեն Ֆելիքս Խաչատրյանթ:
Ըստ նրա, այսօր թատրոնի շենքը գտնվում է վատ պայմաններում եւ
վերանորոգման կարիք ունի: