Հայաստանի ԱԺ-ի մշտական հանձնաժողովներում սկսվել է 2008թ.-ի
պետբյուջեի կատարման տարեկան հաշվետվության նախագծի քննարկումը
29-05-2009 15:34:00 | Հայաստան | Տնտեսություն
ԵՐԵՎԱՆ, 29 ՄԱՅԻՍԻ, ՆՈՅՅԱՆ ՏԱՊԱՆ: Հայաստանի Ազգային Ժողովի
մշտական հանձնաժողովների մայիսի 29-ի համատեղ նիստում սկսվեցին
«Հայաստանի Հանրապետության 2008թ. պետական բյուջեի կատարման մասին»
տարեկան հաշվետվության նախագծի նախնական քննարկումները:
ՀՀ ֆինանսների փոխնախարար-գլխավոր գանձապետ Ատոմ
Ջանջուղազյանը, ներկայացնելով հիմնական մակրոտնտեսական
ցուցանիշները, մասնավորապես, նշվեց, որ 2008թ.-ին, համաշխարհային
ֆինանսական եւ տնտեսական ճգնաժամի պայմաններում, Հայաստանի
տնտեսությունում արձանագրվեց 6,8% աճ, ինչը ծրագրային ցուցանիշին
զիջում է 3,2%-ով: Հաջողվեց ապահովել հարկային եկամուտների
(ներառյալ տուրքերը) սահմանված թիրախը` 621,1 մլրդ դրամ կամ ՀՆԱ-ի
17%: Պահպանվեց գնաճի ծրագրային մակարդակը` 4+/-1,5%` տարեվերջին
կազմելով 5,2%: ՀՆԱ-ի դեֆլյատորը կազմել է 8,5%: Արդյունքում,
2008թ.-ին ՀՆԱ-ն շուկայական գներով կազմել է 3 650 մլրդ դրամ, իսկ
մեկ շնչին ընկնող ՀՆԱ-ն` 1 մլն 128 հազար 600 դրամ կամ 3 689 ԱՄՆ
դոլար:
2008թ.-ին գրանցվել է պետբյուջեի եկամուտների աճ` հարկային եւ
ոչ հարկային եկամուտների գծով: Եկամուտները եւ պաշտոնական
տրանսֆերտները կազմել են 785,4 մլրդ դրամ, ինչը ճշգրտված ծրագրային
ցուցանիշի 97,7%-ն է: Ընդհանուր եկամուտները ՀՆԱ-ի նկատմամբ կազմել
են 21,5%` նախատեսված 21,2%-ի փոխարեն: Ծախսերը կազմել են 810,6
մլրդ դրամ` նախատեսված շուրջ 861 մլրդ դրամի դիմաց, կատարողականը
կազմել է 94,2%, կամ ՀՆԱ-ի 22,2%-ը: Ընդհանուր եկամուտների եւ
ծախսերի ճշգրտված ծրագրային ցուցանիշների թերակատարումը
հիմնականում պայմանավորված է արտաքին աղբյուրներից նախատեսված
միջոցների թերստացմամբ: Պետբյուջեի պակասուրդը կազմել է ՀՆԱ-ի
0,7%-ը` ծրագրված 2,1%-ի փոխարեն:
2008թ.-ին միջին ամսական անվանական աշխատավարձը 2007թ.-ի
նկատմամբ աճել է 17,4 %-ով, ընդ որում` բյուջետային հատվածի
աշխատավարձն աճել է 18,6%-ով: Հաշվետու տարում տնտեսության
բյուջետային եւ ոչ բյուջետային հատվածներում միջին աշխատավարձը,
համապատասխանաբար, կազմել է 64 800 դրամ եւ 114 000 դրամ, իսկ
միջին աշխատավարձը` 91 331 դրամ: 2008թ.-ի դեկտեմբերին
գործազրկության պաշտոնական մակարդակը կազմել է 6,3%, ինչը 2007թ.-ի
համեմատ 0,7%-ով նվազ ցուցանիշ է:
Անցած տարի ՀՀ արտաքին ապրանքաշրջանառությունը կազմել է 5
մլրդ 481 մլն ԱՄՆ դոլար` 2007թ.-ի համեմատ աճելով 24%-ով: Ընդ
որում, արտահանումը 7,2%-ով նվազել է, իսկ ներմուծումը` 35%-ով
աճել:
2008թ.-ին ԱՄՆ 1 դոլարի միջին փոխարժեքը կազմել է 305,97
դրամ` 2007թ.-ի 342,08 դրամի դիմաց: