2008թ.-ի առաջին եռամսյակի համեմատ Հայաստանի պետբյուջեի
ծախսերը 10,4%-ով աճել են
12-05-2009 12:17:00 | Հայաստան | Տնտեսություն
ԵՐԵՎԱՆ, 12 ՄԱՅԻՍԻ, ՆՈՅՅԱՆ ՏԱՊԱՆ: 2009թ.-ի առաջին
եռամսյակում ՀՀ պետական բյուջեի միջոցների հաշվին կատարվել են
153,4 մլրդ դրամի (ավելի քան 411,8 մլն ԱՄՆ դոլար) ծախսեր, որից
2,2 մլրդ դրամը` պետական հիմնարկների արտաբյուջետային միջոցների
հաշվին. մասնավորապես` 147,7 մլրդ դրամ են կազմել ընթացիկ ծախսերը,
5,7 մլրդ դրամ` ոչ ֆինանսական ակտիվների հետ գործառնությունները:
2008թ.-ի նույն ժամանակահատվածի համեմատ բյուջեի ծախսերն ավելացել
են 10,4%-ով կամ 14,4 մլրդ դրամով: Աճը հիմնականում պայմանավորված
է կենսաթոշակների եւ նպաստների, ծառայությունների ձեռքբերման եւ
բյուջետային հիմնարկների աշխատավարձի գծով ծախսերի աճով:
ՀՀ Ֆինանսների նախարարության Տեղեկատվության եւ
հասարակայնության հետ կապերի բաժնի տվյալներով, պետբյուջեի ընթացիկ
ծախսերը 2009թ.-ի հունվար-մարտին կազմել են 147,7 մլրդ դրամ, որոնց
գծով կատարվել է եռամսյակային ծրագրի 91,9%-ը: Ընթացիկ ծախսերից
13,9 մլրդ դրամն ուղղվել է պետական հիմնարկների աշխատողների
աշխատավարձերի վճարմանը, 963,9 մլն դրամ` պարտադիր սոցիալական
ապահովության վճարումներին, որոնց առաջին եռամսյակի կատարողականը
կազմել է, համապատասխանաբար 89,1% եւ 85,3%: Նախորդ տարվա նույն
ժամանակահատվածի համեմատ նշված ծախսերը աճել են, համապատասխանաբար,
20,9%-ով եւ 7,4%-ով: Ծառայությունների եւ ապրանքների ձեռքբերմանը
պետական բյուջեից հատկացվել է 27,8 մլրդ դրամ, որը 12,1%-ով
գերազանցել է նախորդ տարվա նույն ցուցանիշը. այս տարվա
եռամսյակային ծրագիրը կատարվել է 89,4%-ով: 2009թ.-ի առաջին
եռամսյակում 3,5 մլրդ դրամ հատկացվել է պետական պարտքի
սպասարկմանը, որը կազմել է եռամսյակային ծրագրի 98,9%-ը.
մասնավորապես, 2,8 մլրդ դրամ տրամադրվել է ներքին, 700,5 մլն դրամ`
արտաքին պարտքի սպասարկմանը:
2008թ.-ի առաջին եռամսյակի համեմատ պետական պարտքի սպասարկման
ծախսերն աճել են 20,5%-ով կամ 602,7 մլն դրամով, որը պայմանավորված
է ներքին պետական պարտքի սպասարկման ծախսերի աճով: Պետական
բյուջեից տրամադրված սուբսիդիաների գումարը կազմել է 3,7 մլրդ
դրամ, որը 7%-ով փոքր է նախորդ տարվա նույն ցուցանիշից. այդ գծով
ապահովվել է եռամսյակային ծրագրի 87,2% կատարողական:
2009թ.-ի առաջին եռամսյակում պետբյուջեի ընթացիկ ծախսերի
11,6%-ը կամ շուրջ 17,1 մլրդ դրամը կազմել են դրամաշնորհները,
որոնցից 6,9 մլրդ դրամը (նախատեսվածի 100%-ը) տրամադրվել է
համայնքների բյուջեներին համահարթեցման սկզբունքով տրվող
դոտացիաների ֆինանսավորմանը: Դրամաշնորհների եռամսյակային ծրագիրը
կատարվել է 97,4%-ով: