Ղրղզստանի ԱԳՆ նախկին ղեկավարը կասկածվում է սպանության մեջ
11-03-2009 10:58:00 | Ղրղզստան | Միջազգային
ԲԻՇՔԵԿ, 11 ՄԱՐՏԻ, ՆՈՅՅԱՆ ՏԱՊԱՆ: Ղրղզստանի իրավապահ
մարմինները ձերբակալել են «Արդարության համար» ընդդիմադիր շարժման
առաջնորդ, երկրի արտաքին գործերի նախկին նախարար Ալիկբեկ
Ջեկշենկուլովին:
Ինչպես հաղորդում է «Նովոստի» գործակալությունը, Ղրղզստանի
ԱԳՆ նախկին ղեկավարը ձերբակալվել է թուրք գործարար Սերվետ Չեթինի
սպանության հանցակցության կասկածանքով:
«Գնդակը, որ հայտնաբերվել է Թուրքիայի քաղաքացու սպանության
փաստի առնչությամբ դեպքի վայրի զննության ժամանակ, արձակվել է
նախկին նախարար Ալիկբեկ Ջեկշենկուլովին պատկանող ատրճանակից»,-
հայտնել է Ղրղզստանի ՆԳՆ մամուլի քարտուղար Բաքըթ Սեյիտովը:
Թուրք գործարար Սերվետ Չեթինը սպանվել էր 2007 թ. դեկտեմբերի
9-ին Ղրղզստանի Թալաս մարզկենտրոնում: Անհայտ անձը նրա վրա երկու
անգամ կրակել էր հրաձգային զենքից: Դեպքի վայրում հայտնաբերվել էր
Մակարով տեսակի ատրճանակից արձակված 9 մմ տրամաչափի մեկ գնդակ եւ
երկու պարկուճ: