ԵՐԵՎԱՆ, 23 ՀՈՒՆՎԱՐԻ, ՆՈՅՅԱՆ ՏԱՊԱՆ: «Հայ մշակույթը կրեց եւս մի ծանր կորուստ` կյանքից հեռացավ հայ հոգեւոր երգարվեստի անզուգական մշակ, շարականների հմուտ գիտակ Խորեն Պալյանը: Մեծ է նրա վաստակը: Նա ոչ միայն հայ ազգային եւ հոգեւոր երգի բարձրարվեստ կատարող էր, այլեւ դրա անխոնջ մունետիկը աշխարհում, այդ արվեստով սերունդները դաստիարակելու ջատագովը եւ գործունյա անձ»: Այս մասին ասված է Մտավորականների ֆորումի «ՆՈՅՅԱՆ ՏԱՊԱՆ»-ին տրամադրած հաղորդագրությունում: Սերված Պալյանների հռչակավոր ընտանիքից` նա ժառանգել էր եւ մարդկային բարձր նկարագիր, եւ տաղանդ, եւ ազգին ծառայելու անկոտրում կամք: Ըստ հաղորդագրության, «նրա համար խորթ էին այն սեւն ու ստորը, այն ամենաթողությունը, որ վերջին տասնհինգ տարիներին պատուհասում են հայ ժողովրդին»: Նշվում է, որ Խ.Պալյանը երբեք չդավաճանեց ինքն իրեն. նա ապրեց օրինակելի կյանք եւ հավերժացրեց իր անունը հարազատ ժողովրդի անմահների մատյանում: Երեւանի պետական համալսարանի Հայոց լեզվի պատմության ամբիոնի դոցենտ, անվանի շարականագետ, գրաբարի երկարամյա դասախոս, խմբավար եւ երգիչ Խ.Պալյանը ավարտել է Ս.Էջմիածնի հոգեւոր ճեմարանը: 1955թ.-ին Մայր տաճարում ձեռնադրվել է սարկավագ, իսկ 1961թ.-ին երջանկահիշատակ Վազգեն Ա Ամենայն Հայոց կաթողիկոսի ձեռամբ ձեռնադրվել է կուսակրոն քահանա: 1962թ.-ին Օշականում պաշտպանել է վարդապետական ավարտաճառ եւ ստացել վարդապետական չորս աստիճաններ: Սբ. Էջմիածնում զբաղեցրել է պատասխանատու պաշտոններ: 1965թ.-ի ապրիլին Եղեռնի 50-ամյակին Հայաստանում ծայր առած ազգային ինքնագիտակցության աննախընթաց պոռթկումը հիմնական շարժառիթը հանդիսացավ, որպեսզի նա թողնի հոգեւոր ասպարեզը` երբեք չբաժանվելով սակայն եկեղեցուց: 1965թ.-ին նա ընդունվել եւ 3 տարի անց գերազանցությամբ ավարտել է ԵՊՀ-ի բանասիրության ֆակուլտետը, ապա 1968թ.-ին նշանակվել է դասախոս Հայոց լեզվի պատմության ամբիոնում` դասավանդելով լեզվի պատմություն եւ գրաբար: 1978-2004թթ.-ին դասավանդել է Սբ. Էջմիածնի Գեւորգյան հոգեւոր ճեմարանում, ապա Սեւանի Վազգենյան դպրանոցում` ժամակարգություն, տեսական շարականագիտություն եւ հայ հոգեւոր երաժշտություն առարկաները: Նրա ծառայությունները բարձր գնահատելով, Վեհափառ Հայրապետ Գարեգին Բ կաթողիկոսը Խորեն Պալյանին շնորհել է «Ս.Ներսես Շնորհալի» շքանշանը: Խ.Պալյանն ամուսնացած էր հոգեւոր երգերի անզուգական եւ հռչակավոր կատարող Լուսինե Զաքարյանի հետ: Խ.Պալյանի հուղարկավորությունը տեղի կունենա հունվարի 25-ին` Էջմիածնի Սբ.Գայանե վանքի գերեզմանատանը:

---