ՀԱԳ-ՈՒՄ ԲԱՑՎԵՑ ՀԱԿՈԲ ՀՈՎՆԱԹԱՆՅԱՆԻ 200-ԱՄՅԱԿԻՆ ՆՎԻՐՎԱԾ
ՑՈՒՑԱՀԱՆԴԵՍ
26-12-2006 18:10:00 | Հայաստան | Մշակույթ
ԵՐԵՎԱՆ, 26 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Հակոբ Հովնաթանյանի
200-ամյակին էր նվիրված դեկտեմբերի 26-ին Հայաստանի Ազգային
գրադարանում (ՀԱԳ) բացված ցուցահանդեսը: Ցուցադրանքում ընդգրկված
են նկարչի մասին մամուլում, հանդեսներում հրապարակված հոդվածներ,
ինչպես նաեւ նրա գործերի վերատպությունները:
ՀԱԳ-ի Կերպարվեստի եւ քարտեզագրական նյութերի բաժնի վարիչ
Ռիմա Հայրապետյանի խոսքերով, Հովնաթանյանները հատկանշական տեղ են
զբաղեցնում հայկական կերպարվեստի պատմության մեջ: Շուրջ 2 դար, ըստ
նրա, այս գերադաստանը հարստացրել է հայկական մշակույթը եւ թողել
որոշակի հետք ազգային գեղանկարչության զարգացման գործում:
Ռ.Հայրապետյանը նշեց, որ նկարչի առաջին ուսուցիչը եղել է
հայրը, որի հետ նա նկարազարդել է Թբիլիսիի մի քանի եկեղեցիներ:
Սակայն, Հ.Հովնաթանյանի տաղանդը դրսեւորվել է դիմանկարչության
ժանրում, եւ պատահական չէ, որ Թբիլիսիիում նա հայտնի էր իբրեւ
«Թիֆլիսյան Ռաֆայել»: Ըստ Ռ.Հայրապետյանի, նկարչի ստեղծած
դիմանկարները, որոնք դիտողին հիացնում են եւ' ներքին
բովանդակությամբ, եւ' կատարողական բարձր արվեստով, կարող են մրցել
համաշխարհային դիմանկարչության լավագույն նմուշների հետ:
Նշվեց նաեւ, որ որոշակի տվյալներով Հ.Հովնաթանյանը վրձնել է
շուրջ 500 դիմանկար, սակայն պահպանվել է դրանցից մոտ հինգ
տասնյակը: Նկարչի լավագույն գործերի շարքին են դասվում ներսես
Աշտարակեցու, Շուշանիկ Նադիրյանի, Նատալյա Թեումյանի դիմանկարները:
Ի դեպ, Ն.Թեումյանի դիմանկարը անվանում են նաեւ «Հայկական
Ջոկոնդա»: