ԵՐԵՎԱՆ, 20 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Դեկտեմբերի 20-ի ժամը
04-ի սահմաններում ՀՀ ոստիկանության Արմավիրի բաժնում ահազանգ է
ստացվել, որ Նալբանդյան գյուղում կրակել են գյուղապետ Ռոլանդ
Գրիգորի Մկրտչյանի վրա: Ահազանգի առնչությամբ անմիջապես դեպքի վայր
մեկնած օպերատիվ-քննչական խումբը պարզել է, որ նույն օրը ժամը 03-ի
սահմաններում անհայտ անձը տանից դուրս է կանչել Ռ.Մկրտչյանին եւ
բակում հրազենից կրակել գյուղապետի պարանոցին եւ սպանել նրան:
Փաստի առթիվ Արմավիրի մարզի դատախազությունում հարուցվել է
քրեական գործ ՀՀ Քրեական օրենսգրքի 104-րդ հոդվածի 1-ին եւ 235-րդ
հոդվածի 1-ին մասերի հատկանիշներով: Ինչպես «ՆՈՅՅԱՆ ՏԱՊԱՆ»-ին
հայտնեցին ՀՀ Գլխավոր դատախազությունից, նշանակվել են
դատաբժշկական, դատակենսաբանական, դատաձգաբանական, դատահետքաբանական
փորձաքննություններ, հարցաքննվել են մի շարք վկաներ: