ԱՄՓՈՓՎԵՑԻՆ ԹԱՏԵՐԱԿԱՆ ԵՎ ԵՐԱԺՇՏԱԿԱՆ ՓԱՌԱՏՈՆՆԵՐԻ ԱՐԴՅՈՒՆՔՆԵՐԸ
08-12-2006 19:40:00 | Հայաստան | Մշակույթ
ԵՐԵՎԱՆ, 8 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: ՀՀ մշակույթի եւ
երիտասարդության հարցերի նախարարության պատասխանատուները
դեկտեմբերի 8-ին միանգամից ամփոփեցին երկու` «Նռան հատիկ»
թատերական եւ Էմին Խաչատուրյանի անվան փողային նվագախմբի 3-րդ
հանրապետական փառատոնները:
Փոխնախարար Կարինե Խոդիկայնը համոզմունք հայտնեց, որ արդեն
ավանդական դարձած «Նռան հատիկը» ունի իր հանդիսատեսը, որն ամեն
տարի անհամբերությամբ սպասում է թատրոնի հերթական տոնին: Այս
հանգամանքը, ըստ փոխանախարարի, խիստ պարտավորեցնող է, եւ
կազմակերպիչները պետք է ավելի հետաքրքիր ներկայացումներ բեմադրեն:
Նա նշեց, որ փառատոնի 11 օրերի ընթացքում ներկայացումները դիտել են
մոտ 5000 հանդիսատես` Երեւանից եւ մարզերից:
Նոյեմբերի 30-ից դեկտեմբերի 5-ը անցկացված Էմին Խաչատուրյանի
անվան փողային նվագախմբի փառատոնը, ըստ «Օպերա+» երաժշտական
գործակալության տնօրեն Վարդան Հակոբյանի, այսօր շատ կարեւոր է
փողային նվագախմբերի գործունեությունը խթանելու եւ փողային
նվագախմբային ժանրի զարգացումն ու տարածումը ապահովելու համար: Նրա
խոսքերով, Հայաստանում մանկապատանեկան փողային նվագախմբերի թիվը
տարեցտարի նվազում է, ինչը վտանգում է փողային արվեստի
գոյությունը:
Պրն. Հակոբյանը համոզված է, որ տարբեր ժանրում հաճախակի
կազմակերպվող փառատոնները եւ մրցույթները ի հայտ են բերում
շնորհալի պատանի երաժիշտ-կատարողների (դաշնամուր, ջութակ, երգ,
պար, ասմունք), իսկ փողային նվագախմբերի պատանի երաժիշտները ոչ
միշտ են հնարավորություն ունենում ներկայանալ հանրությանը:
Այս փառատոնին մասնակցել են Երեւանի եւ մարզերի փողային
նվագախմբեր, անսամբլներ` առանց տարիքային սահմանափակման: