ՏԱՐԵՍԿԶԲԻՑ ՀԱՅԱՍՏԱՆՈՒՄ ԱՐՁԱՆԱԳՐՎԵԼ Է ՄԻԱՎ-ՈՎ ՎԱՐԱԿՄԱՆ 62
ՆՈՐ ԴԵՊՔ
30-11-2006 18:20:00 | Հայաստան | Հասարակություն
ԵՐԵՎԱՆ, 30 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Դեկտեմբերի 1-ը ՁԻԱՀ-ի
(ՍՊԻԴ) դեմ պայքարի միջազգային օրն է: Հայաստանում առաջին ՄԻԱՎ
վարակակրի հայտնաբերումից` 1988թ.-ից, մինչեւ այս տարվա նոյեմբերի
30-ը ՀՀ քաղաքացիների շրջանում արձանագրվել է վարակի 425 դեպք:
Ինչպես «ՆՈՅՅԱՆ ՏԱՊԱՆ»-ի թղթակցին հայտնեցին ՁԻԱՀ-ի կանխարգելման
հանրապետական կենտրոնից, այս տարեսկզբից հանրապետությունում
արձանագրվել է ՄԻԱՎ վարակի 62 նոր դեպք: Վարակակիրներից 325-ը կամ
76,5%-ը տղամարդիկ են, 100-ը կամ 23,5%-ը` կանայք, իսկ 8-ը կամ
1,9%-ը` երեխաներ: ՄԻԱՎ վարակակիրների 74,6%-ը 20-39 տարեկան են:
425 վարակակիրներից 147-ի (25 կին եւ 4 երեխա) մոտ ախտորոշվել
է ՁԻԱՀ, ընդ որում` 42-ի մոտ այս տարվա ընթացքում: Մինչ օրս
գրանցվել է ՄԻԱՎ/ՁԻԱՀ-ով հիվանդների մահվան 97 դեպք: Մահացածների
թվում են 18 կին եւ 3 երեխա:
ՄԻԱՎ վարակի դեպքերի առավելագույն թիվը` 213 կամ 50,1%-ը,
արձանագրվել է Երեւանում: Վարակի գրանցված դեպքերի թվով երկրորդ
տեղում Շիրակի մարզն է` 9,2%:
Նշվեց նաեւ, որ ՄԻԱՎ/ՁԻԱՀԻ իրավիճակի գնահատումը վկայում է,
որ հաշվարկային տվյալներով հանրապետությունում կա 2008-3000
ՄԻԱՎ-ով ապրող մարդ: