ԵՐԵՎԱՆ, 28 ՆՈՅԵՄԲԵՐԻ, ՆՈՅՅԱՆ ՏԱՊԱՆ: ՀՀ Սահմանադրական
դատարանը նոյեմբերի 28-ին մերժեց քաղաքացի Հովհաննես Ռուշանյանի
դիմումը` ՀՀ Քաղաքացիական դատավարության օրենսգրքի 218 հոդվածի
2-րդ մասի 4-րդ կետը Սահամանադրությանը ոչ համապատասխան ճանաչելու
մասին: Դատարանը որոշեց, որ օրենսգրքի նշված կետի եւ
Սահամանադրության միջեւ հակասություն չկա:
Հ.Ռուշանյանը այդ հոդվածի սահմանադրականության հարցը
վիճարկում էր ընդհանուր իրավասության դատարաններում քննված իր
հայցի կապակցությամբ, որով պահանջում էր «ԱրմենՏել» ՓԲԸ-ից
տրամադրել հեռախոսավարձը 50%-ով վճարելու օրենքով սահմանված
արտոնությունը: Ըստ Հ.Ռուշանյանի, 1994թ.-ին կնքված միջպետական
համաձայնագրով ինքը համարվում է պատերազմի հաշմանդամ (որին հասնում
է հիշյալ արտոնությունը), այլ ոչ թե դրան հավասարեցված անձ:
Պատասխանող կողմի` ԱԺ-ի ներկայացուցիչը գտնում էր, որ հայցվորը
վիճարկում է ոչ թե սահմանադրականության հարցը, այլ, մասնավորապես,
ՀՀ Քաղաքացիական գործերով Վերաքննիչ դատարանի վճռի
օրինականությունը եւ հիմնավորվածությունը: