ԹՈՒՐՔԻԱՆ ԿԱՐՈՂ Է ԵՎՐԱՊԱԿԱՆ ԴԱՏԱՐԱՆ ԴԻՄԵԼ ՀԱՅՈՑ
ՑԵՂԱՍՊԱՆՈՒԹՅԱՆ ԺԽՏՈՒՄԸ ՔՐԵԱԿԱՆԱՑՆԵԼՈՒ ՖՐԱՆՍԻԱՅԻ ԱԺ-Ի ԸՆԴՈՒՆԱԾ
ՕՐԵՆՔԻ ԿԱՊԱԿՑՈՒԹՅԱՄԲ
06-11-2006 17:32:00 | Թուրքիա | Միջազգային
ՍՏԱՄԲՈՒԼ, 6 ՆՈՅԵՄԲԵՐԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ: Մարդու
իրավունքների եվրոպական դատարանի թուրք անդամ Ռըզա Թյուրմենը
Ստրասբուրգում մի խումբ թուրք լրագրողների հետ հանդիպմանը
հայտարարել է, թե Թուրքիան կարող է երկու տարբեր ձեւերով հակազդել
Հայոց ցեղասպանության ժխտումը քրեականացնելու մասին Ֆրանսիայի
Ազգային ժողովի ընդունած օրինագծին: Ըստ նրա, երկու ձեւերի
տրամաբանական ավարտը հարցը Եվրոպական դատարան տեղափոխելն է:
Ինչպես հաղորդում է Ստամբուլի «Մարմարա» օրաթերթը, դատավորի
պնդմամբ` առաջին հակազդեցությունը կարող է լինել այն, որ թուրքական
պետությունը դատ հարուցի Ֆրանսիայի նկատմամբ: «Նման
դատավարությունը կարող է հետաքրքրական լինել, սակայն այն իր հետ
կբերի երկու երկրների հարաբերություններին հարված հասցնելու
վտանգը»,- հայտարարել է թուրք դատավորը:
Հակազդեցության երկրորդ ձեւն էլ, ըստ դատավորի, հետեւյալն է.
սպասել, որ ինչ որ մեկը դատապարտվի այդ օրենքով եւ այդ անձը դիմի
եվրոպական դատարան: