ՍՎԵՐԴԼՈՎՍԿՈՒՄ ԱՆՑԿԱՑՎԵԼ ԵՆ ՀԱՅԿԱԿԱՆ ՄՇԱԿՈՒՅԹԻ ՕՐԵՐ
06-11-2006 16:11:00 | Հայաստան | Մշակույթ
ԵՐԵՎԱՆ, 6 ՆՈՅԵՄԲԵՐԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ:
Ռուսաստանում Հայաստանի տարվա շրջանակներում հոկտեմբերի 29-ից
նոյեմբերի 1-ը Սվերդլովսկի մարզում Հայաստանի պարի պետական
անսամբլի եւ երեւանի մնջախաղի պետական թատրոնի մասնակցությամբ տեղի
են ունեցել հայկական մշակույթի օրեր: Հայաստանյան մշակութային
պատվիրակությունը գլխավորում էր ՀՀ մշակույթի եւ երիտասարդության
հարցերի փոխնախարար Արթուր Պողոսյանը:
Ինչպես նոյեմբերի 6-ին հրավիրված մամլո ասուլիսում հայտնեց
Արթուր Պողոսյանը, հայկական մշակույթի օրերի պաշտոնական բացումը
տեղի է ունեցել հոկտեմբերի 30-ին Եկատերինբուրգի երաժշտական
կոմեդիայի պետական թատրոնում` Հայաստանի պարի պետական անսամբլի
ելույթով: Ըստ փոխնախարարի, մշակութային օրերն անցել են բարձր
մակարդակով եւ հայաստանյան կոլեկտիվները ելույթներ են ունեցել
Եկատերինբուրգի եւ Կամենսկ-Ուրալսկի լավագույն համերգային
դահլիճներում եւ թատերաբեմերում: Այդ օրերին հայկական
պատվիրակության անդամները հանդիպումներ են ունեցել Սվերդլովսկի
մարզի մշակույթի նախարար Ն.Վետրովայի եւ մարզի այլ պաշտոնատար
անձանց հետ: Հանդիպման ընթացքում քննարկվել եւ նախանշվել են
մշակութային համագործակցության հետագա ծրագրերը: