ՀԱՅԱՍՏԱՆՈՒՄ ԿՍՏԵՂԾՎԻ ԵՐԱԺՇՏԱԿԱՆ ԳՈՐԾԻՔՆԵՐԻ ՎԵՐԱԿԱՆԳՄԱՆ ԵՎ
ՊԱՀՊԱՆՄԱՆ ԿԵՆՏՐՈՆ
31-10-2006 20:15:00 | Հայաստան | Մշակույթ
ԵՐԵՎԱՆ, 31 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: ՀՀ Մշակույթի եւ
երիտասարդության հարցերի նախարարության եւ երաժշտական գործիքներ
վերանորոգող «Մշակույթ եւ համագործակցություն» եվրոպական
ասոցիացիայի նախաձեռնությամբ Հայաստանում 2006թ.-ի սեպտեմբերից
մինչեւ 2007թ. հուլիս ամիսն ընկած ժամանակահտվածում իրականացվում
են երաժշտական գործիքների վերականգնող, պահպանող եւ նոր գործիքներ
պատրաստող վարպետների ուսուցման ծրագիր: Ինչպես հոկտեմբերի 31-ի
ասուլիսում հայտարարեց ասոցիացիայի նախագահ, Շալոն-ան-Շամպայնի
ազգային բեմարվեստի տնօրեն Ֆիլիպ Բակմանը, այս ծրագիրը հաստատվել է
Եվրոհանձնաժողովի կողմից եւ իրականացվում է Եվրոմիության անդամ
երկրներում:
«Հայաստանում այս ծրագրի իրականացման գաղափարն առաջացավ մեկ
տարի առաջ, երբ ես այցելեցի Հայաստան եւ տեսա, թե ինչ լավ
երաժշտություն եւ ինչ լավ մասնագետներ ունեն հայերը»,- հայտնեց
Ֆ.Բակմանը: Նա նշեց, որ ծրագրի շրջանակներում Հայաստանում իրենց
գործընկերներն են լինելու Երեւանի Կոմիտասի անվան կոնսերվատորիան,
Ալ.Սպենդարյանի անվան օպերայի եւ բալետի ակադեմիական թատրոնը,
Հայաստանի ֆիլհարմոնիկ նվագախումբը, Հայաստանի պետական կամերային
նվագախումբը, ինչպես նաեւ Արամ Խաչատրյանի տուն-թանգարանը:
Ֆ.Բակմանի խոսքերով, մեկ տարվա ընթացքում նախատեսվում է
կազմակերպել եվրոպացի մասնագետների կարճատեւ գործուղումներ
Հայաստան եւ հայ վարպետների երկարաժամկետ գործուղումներ եվրոպական
երկրներ: Բացի այդ, Հայաստանում կստեղծվի երժշտական գործիքների
վերկանգնման կենտրոն, կբացվեն արհեստանոցներ եւ կկազմակերպվի
հայկական ժողովրդական գործիքների պատրաստման փորձի փոխանակում
եվրոպացի վարպետների համար:
Ֆ.Բակմանը տեղեկացրեց նաեւ, որ 2007թ.-ի փետրվարին
Ֆրանսիայում կայանալիք համերգին մասնակցող Հայաստանի ֆիլհարմոնիկ
նվագախումբը հանդես կգա արդեն վերանորոգված գործիքներով: