ԲԱՔՈՒՆ ԹՈՒՐՔԻԱՅԻՆ ԿՈՉ Է ԱՆՈՒՄ ԱՐՏԱՔՍԵԼ 70 ՀԱԶԱՐ ՀԱՅԵՐԻ
13-10-2006 15:31:00 | Ադրբեջան | Միջազգային
ԲԱՔՈՒ, 13 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: «Ադրբեջանը եւ Թուրքիան
միասին պետք է հանդես գան Ֆրանսիայի դեմ» Հայոց ցեղասպանության
վերաբերյալ օրինագծի ընդունման առնչությամբ եւ «հարցը դնել
խստորեն»: Այս մասին հայտարարել է Ադրբեջանի խորհրդարանի
պատգամավոր Գանիրա Փաշաեւան: «Նախ, Թուրքիան պետք է ճանաչի
Ֆրանսիայի կատարած ցեղասպանությունը Ալժիրում: Այնուհետեւ Թուրքիան
պետք է ճանաչի հայերի կողմից ադրբեջանցիների նկատմամբ Խոջալուում
սարքված ցեղասպանությունը: Միաժամանակ, հարկավոր է վերանայել
տնտեսական կապերը Ֆրանսիայի հետ: Ֆրանսիական խորհրդարանի քայլը
կարող է միտման սկիզբ դառնալ Եվրոպայում, եւ ուրիշ երկրներ կարող
են հետեւել Ֆրանսիայի օրինակին»,- հայտարարել է նա:
«Թուրքիայում անլեգալ վիճակով ապրում եւ աշխատում են ավելի
քան 70 հազար հայեր: Թուրքիայի կառավարությունը պետք է որոշում
ընդունի հայ-անլեգալներին երկրից արտասքելու վերաբերյալ, եւ դա չի
հակասի միջազգային իրավունքին: Եթե նրանք պնդում են
ցեղասպանությունը եւ այդպիսի քայլեր են ձեռնարկում Թուրքիայի դեմ,
ապա ինչու են նրանք այդ երկիրն ընտրել բնակության համար: Թող գնան
Ֆրանսիա, կամ այլ երկիր, որը ճանաչում է հայոց ցեղասպանությունը»,-
ասել է Փաշաեւան: Ինչ վերաբերում է այն փաստին, որ Ֆրանսիան
ղարաբաղյան հակամարտության կարգավորման ԵԱՀԿ Մինսկի խմբի
համանախագահ է, Գանիրա Փաշաեւան հայտարարել է. «Կարծում եմ, որ
մենք լրջորեն պետք է խորհենք այդ հարցի շուրջ, քանի որ Ֆրանսիան
նման օրենք ընդունելով, եւ այդ հարցում ցուցադրեց իր դիրքորոշումը:
Հարկ կլինի կամ փոխել համանախագահների կազմը, կամ ընդլայնել Մինսկի
խմբի ձեւաչափը»,- հաղորդում է «Դեյ.ազը»: