ԵԱՀԿ ՄԽ ՀԱՄԱՆԱԽԱԳԱՀՆԵՐԸ ՕՍԿԱՆՅԱՆԻ ԵՎ ՄԱՄԵԴՅԱՐՈՎԻ ՄՈՍԿՈՎՅԱՆ
ԲԱՆԱԿՑՈՒԹՅՈՒՆՆԵՐԸ ՀԱՄԱՐՈՒՄ ԵՆ ՇԱՏ ՕԳՏԱԿԱՐ ԵՎ ԲՈՎԱՆԴԱԿԱԼԻՑ
09-10-2006 17:27:00 | Ադրբեջան | Միջազգային
ԲԱՔՈՒ, 9 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Հոկտեմբերի 6-ին
Մոսկվայում Ադրբեջանի եւ Հայաստանի արտաքին գործերի նախարարների
հետ կայացած բանակցությունները շատ օգտակար էին եւ բովանդակալից:
Այս մասին հայտնել է ԵԱՀԿ Մինսկի խմբի ռուս համանախագահ Յուրի
Մերզլյակովը:
Ըստ նրա, երկու նախարարները դրական գնահատական են տվել
անցկացված կոնսուլտացիաներին: Ես չեմ կարծում, որ համանախագահները
չեն կիսում նրանց կարծիքները,- ասել է նա: Դիվանագետը հայտնել է,
որ կարգավորման «հիմնարար սկզբունքների» առնչությամբ ներկայացված
առաջարկներին կողմերի պատասխանները ստանալուց հետո միջնորդները
շարունակել են կոնսուլտացիաները: Մոսկովյան հանդիպմանը ՄԽ
համանախագահների ուշադրությունը կենտրոնացել է «որոշ սկզբունքների
այն տարրերին, որոնց առնչությամբ կային տարաձայնություններ»,- ասել
է Յու.Մերզլյակովը եւ ավելացրել, որ «մենք փոխըմբռնման հասնելու
հույսեր ենք կապում» այն բանակցությունների հետ, որոնք,
ակնհայտորեն, կշարունակվեն հոկտեմբերի 24-ին Փարիզում:
Դիվանագետը նշել է, որ մոսկովյան հանդիպմանը չի քննարկվել
Ադրբեջանի եւ Հայաստանի նախագահների հերթական հանդիպումը
կազմակերպելու հարց. այդ հարցը բանակցությունների առարկա կլինի
Փարիզում: Յու.Մերզլյակովը նաեւ հերքել է կանխավ տարածված այն
հաղորդումները, որ հոկտեմբերի 17-ին Մինսկում ԱՊՀ գագաթնաժողովի
ժամանակ կարող է կայանալ հակամարտության կողմերի առաջնորդների
հանդիպում: Ըստ դիվանագետի, հոկտեմբերի 17-ին Մինսկում ընդհանրապես
չի ծրագրվում ԱՊՀ գագաթնաժողով անցկացնել, այն ծրագրված է
նոյեմբերին:
Յու.Մերզլյակովը նաեւ հայտնել է, որ հոկտեմբերի 16-ին
Մինսկում ծրագրված է ԱՊՀ երկրների արտաքին գործերի նախարարների
խորհրդի նիստ: Նկատի առնելով, որ այդ միջոցառմանը հավանաբար չի
մասնակցի ՀՀ նախարարը, որոշվել է նրանց հանդիպումը կազմակերպել
հոկտեմբերի 24-ին Փարիզում, հաղորդում է «Թրենդը»: