ՍԱՀԱԿԱՇՎԻԼԻՆ ՎՍՏԱՀԵՑՆՈՒՄ Է, ՈՐ ԻՐ ԿՈՒՍԱԿՑՈՒԹՅՈՒՆԸ ՀԱՂԹԵԼ Է
ԸՆՏՐՈՒԹՅՈՒՆՆԵՐՈՒՄ
06-10-2006 19:51:00 | Վրաստան | Միջազգային
ԹԲԻԼԻՍԻ, 6 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Սահակաշվիլին
վստահեցնում է, որ իր կուսակցությունը այս անգամ ավելի շատ ձայներ
է հավաքել, քան 2004 թվականի մարտին: Ընտրական տեղամասերի ելքի մոտ
կատարված հարցման տվյալներով, Վրաստանի տեղական ինքնակառավարման
մարմինների ընտրություններում հաղթանակ է տարել նախագահ Միխայիլ
Սահակաշվիլու «Միացյալ ազգային շարժում» կառավարող
կուսակցությունը:
Ըստ առկա տվյալների, Սահակաշվիլու կուսակցությանն են իրենց
ձայնը տվել ընտրողների կեսից ավելին, հաղորդում է Բի-Բի-Սին:
Վրաց առաջնորդը շնորհավորել է իր կողմնակիցներին հաղթանակի
կապակցությամբ. «Ինձ համար հաճելի է հայտնել, որ «Միացյալ ազգային
շարժումը» համոզիչ հաղթանակ է տարել կայացած ընտրություններում»:
«Մեր կուսակցությունը գտնվում է իշխանության մեջ գրեթե
երկուսուկես տարի, այն ժամանակից, երբ 2004 թվականի մարտին կայացան
խորհրդարանական ընտրությունները: Ողջ Վրաստանում «ազգային
շարժումը» ավելի շատ ձայներ է ստացել, քան անցած
ընտրություններում»,- հայտարարել է Վրաստանի նախագահը:
Իսկ վրաց ընդդիմությունը համարում է, որ ընտրություններն
ուղեկցվել են լուրջ խախտումներով:
«Ներկայիս իշխանությունները ոչնչով չեն տարբերվում իրենց
նախորդներից` Շեւարդնաձեից եւ Աբաշիձեից, եւ օգտագործում են
ընտրությունների կեղծման հենց նրանց տեխնոլոգիաները»,-
Հանրապետական կուսակցության առաջնորդներից Դավիթ Բերձենիշվիլու
խոսքերն է մեջբերում «Ինտերֆաքսը»: