ՖՐԱՆՍԻԱՅՈՒՄ ԵՎ ՀԱՅԱՍՏԱՆՈՒՄ ԿԲԱՑՎԵՆ ԺԱՄԱՆԱԿԱԿԻՑ ԱՐՎԵՍՏԻ
ՑՈՒՑԱՀԱՆԴԵՍՆԵՐ
06-10-2006 19:10:00 | Հայաստան | Մշակույթ
ԵՐԵՎԱՆ, 6 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Ֆրանսիայում Հայաստանի
տարվա շրջանակներում նոյեմբերի 2-15-ը Երեւանում, իսկ 2007թ.-ի
մարտին` Փարիզում կգործեն «Կապույտ անհունը. ծովային անուրջներ
Գյումրիի, Երեւանի, Փարիզի եւ Լիոնի միջեւ» խորագրով ժամանակակից
արվեստի ցուցահանդեսները: Հայ եւ ֆրանսիացի ժամանակակից նկարիչները
կներկայացնեն 2006 թվականի օգոստոսի 12-22-ին Գյումրիում անցկացված
«Ծովը. երազներ ու պատրանքներ» թեմայով Արվեստի միջազգային 5-րդ
բիենալեի աշխատանքները:
Ինչպես «ՆՈՅՅԱՆ ՏԱՊԱՆ»-ի թղթակցին հայտնեցին Ֆրանսիայում
Հայաստանի տարվա միջոցառումների կազմակերպման գրասենյակից,
ֆրանսիացի եւ հայ մեկ տասնյակ ստեղծագործողների աշխատանքների
շնորհիվ հնարավոր կլինի ծանոթանալ երկու երկրների ժամանակակից
արվեստի ուղղություններին: Ցուցահանդեսին մասնակցելու նպատակով
Լիոնից Երեւան կժամանեն հայտնի արվեստագետներ Ժանտիյ Գարսոնը ու
Դելֆին Բալլեն: Ֆրանսիացի ստեղծագործողներից Նատալի Բրեվեն ու
Հյուգ Ռոշետը կներկայացնեն տեսամոնտաժ:
Հայ ստեղծագործողների թվում է Գյումրիի ժամանակակից արվեստի
կենտրոնի համահիմնադիր Ազատ Սարգսյանը, որը այդ օրերին կներկայացնի
վիդեո աշխատանք Սեւանա լճի մասին: