ՊԻՏԵՐ ՍԵՄՆԵԲԻՆ ՂԱՐԱԲԱՂՅԱՆ ԳՈՐԾԸՆԹԱՑԻ ՇՈՒՐՋ ԻՐԱԴՐՈՒԹՅՈՒՆԸ
«ԲԱՑԱՐՁԱԿԱՊԵՍ ԱՆՀՈՒՍԱԼԻ» ՉԻ ՀԱՄԱՐՈՒՄ
06-10-2006 15:00:00 | Ֆրանսիա | Միջազգային
ՍՏՐԱՍԲՈՒՐԳ, 6 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Հարավային Կովկասում
Եվրամիության հատուկ ներկայացուցիչ Պիտեր Սեմնեբին Եվրախորհրդարանի
արտաքին հարաբերությունների կոմիտեի նիստում հայտարարել է, որ
ղարաբաղյան հակամարտության կարգավորման գործընթացում Հայաստանը եւ
Ադրբեջանը ժամանակ են ձգում: Ըստ նրա, Ադրբեջանը հույս ունի, որ
էներգակիրներից ստացած շահույթը երկրին թույլ կտա ժամանակի
ընթացքում դառնալ «ավելի հարուստ եւ ավելի հզոր ռազմական
տեսակետից»: «Սպառազինությունների կուտակումը լուրջ խնդիր է եւ
անհանգստության պատճառ եւ, կարծում եմ, որ դա ազդեցություն է
գործում այն հանգամանքի վրա, որ Ադրբեջանը ղարաբաղյան
հակամարտության լուծումը ծայրաստիճան հրատապ չի համարում»,-
հայտարարել է Պիտեր Սեմնեբին: Միեւնույն ժամանակ նա կարծիք է
հայտնել, որ «եւ Հայաստանն է ժամանակ ձգում»: Ըստ դիվանագետի,
«Երեւանը սպասում է Կոսովոյի հարցի լուծմանը եւ հույս ունի, որ
ժամանակի հետ կյանքի իրողությունները իրենց դերը կխաղան»:
Այդուհանդերձ, ԵՄ հատուկ ներկայացուցիչը չի կարծում, որ ղարաբաղյան
հակամարտության կարգավորման շուրջ ստեղծված իրադրությունը
«բացարձակապես անհուսալի» է: Ըստ որում նա հայտնել է, որ շուտով
կհանդիպեն Հայաստանի եւ Ադրբեջանի արտաքին գործերի նախարարները,-
հաղորդում է «Ազատություն» ռադիոկայանը: