ԵՐԵՎԱՆՈՒՄ ՄԵԿՆԱՐԿԵՑ «ՀԱՅՖԵՍՏ» ՄԻՋԱԶԳԱՅԻՆ ԹԱՏԵՐԱԿԱՆ ՉՈՐՐՈՐԴ
ՓԱՌԱՏՈՆԸ
04-10-2006 21:42:00 | Հայաստան | Մշակույթ
ԵՐԵՎԱՆ, 4 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Մոսկվայի «Պրակտիկա»
թատրոնի «Ամեն ինչ փողի մասին» ներկայացումով Հովհ.Թումանյանի
անվան տիկնիկային թատրոնում հոկտեմբերի 4-ին մեկնարկեց «Հայֆեստ»
միջազգային թատերական չորրորդ փառատոնը:
Մինչ այդ լրագրողները հանդիպեցին Թբիլիսիի թատրոնի եւ կինոյի
պետական համալսարանի պրոռեկտոր, «Կովկասյան» հիմնադրամի նախագահ
Լեւան Խեթագուրիի, Արվեստի ինստիտուտների համաեվրոպական լիգայի
նախագահ Մարտեն Ռեգոուինի եւ «Պրակտիկայի» գեղարվեստական ղեկավար
Էդուարդ Բոյակովի հետ:
Ըստ հյուրերի, «Հայֆեստ»-ն իր տեսակի մեջ աշխարհում չորրորդն
է Էդինբուրգի, Ավինյոնի եւ Սիբիուի փառատոններից հետո: Արդեն
չորրորդ տարին կազմակերպվող այս փառատոնը դարձել է ճանաչված եւ
ամեն անգամ հանդիսատեսին ներկայանում է նոր անուններով ու
մասնակիցների աննախադեպ աճող թվով: Նրանք նշեցին, որ ետխորհրդային
բոլոր երկրներում, այդ թվում եւ Ռուսաստանում, մշակույթը նույն
կերպ է զարգանում, ինչպես Հայաստանում:
Նրանք հատկապես կարեւորեցին փառատոնի օրերին կազմակերպվող
վարպետության դասընթացներն, ինչպես նաեւ սեմինարները` նվիրված
արտմենեջմենթի կազմակերպման ձեւերին: