ԻԼՀԱՄ ԱԼԻԵՎ. «ԱԴՐԲԵՋԱՆԸ ԲԱԽՎԵԼ Է ԱՀԱԲԵԿՈՒԹՅԱՆ ՀԱՅԱՍՏԱՆԻ
ԿՈՂՄԻՑ»
11-09-2006 17:37:00 | Ադրբեջան | Միջազգային
ԲԱՔՈՒ, 11 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Որոշ ուժեր ցանկանում են
իսլամը կապել ահաբեկության հետ: Իսլամը խաղաղության եւ
հանդուրժողականության կրոն է: Մենք ցանկանում ենք ապրել խաղաղ, եւ
մենք կհասնենք դրան: Այս մասին, ինչպես հաղորդում է «Թրենդը»,
այսօր Բաքվում հայտարարել է Ադրբեջանի նախագահ Իլհամ Ալիեւը`
ելույթ ունենալով Իսլամական համաժողով կազմակերպության անդամ
երկրների տուրիզմի նախարարների հինգերորդ համաժողովում:
«Այսօր սեպտեմբերի 11-ն է: Հինգ տարի առաջ կատարվեց սարսափելի
ահաբեկչություն, որի հետեւանքով զոհվեցին անմեղ մարդիկ: Իսլամական
աշխարհը դատապարտեց այդ փաստը: Մենք պետք է միավորենք բոլոր
ջանքերը ահաբեկության դեմ պայքարելու համար: Ոչ մի դեպքում չի
կարելի միայնակ պայքարել ահաբեկության դեմ»,- հայտարարել է
Ադրբեջանի նախագահը:
Իր ելույթում Ի.Ալիեւը առանձին ուշադրություն է դարձրել
ղարաբաղյան խնդրին, որը, նրա կարծիքով, այսօր տարածաշրջանի
ամենամեծ խնդիրն է:
Ըստ նրա, չնայած այդ հարցի առնչությամբ միջազգային
կազմակերպությունների ընդունած բանաձեւերին, հարցը մինչ օրս
լուծում չի գտել: Դրանից բացի, նկատել է նախագահը, Ադրբեջանը
«բախվել է ահաբեկության Հայաստանի կողմից», որի արդյունքում զոհվել
են մեծ թվով մարդիկ: