ՀԱՐՈՒԹՅՈՒՆ ԽԱՉԱՏՐՅԱՆԻ «ՊՈԵՏԻ ՎԵՐԱԴԱՐՁԸ» ՖԻԼՄՆ ԸՆԴԳՐԿՎԱԾ Է
ԿԱՌԼՈՎԻ ՎԱՐԻԻ ՄԻՋԱԶԳԱՅԻՆ ԿԻՆՈՓԱՌԱՏՈՆԻ ՄՐՑՈՒԹԱՅԻՆ ԾՐԱԳՐՈՒՄ
28-06-2006 18:00:00 | Հայաստան | Մշակույթ
ԵՐԵՎԱՆ, 28 ՀՈՒՆԻՍԻ, ՆՈՅՅԱՆ ՏԱՊԱՆ: Կինոռեժիսոր Հարություն
Խաչատրյանի «Պոետի վերադարձը» կինոնկարը կմասնակցի հունիսի 30-ից
հուլիսի 8-ը անցկացվելիք Կառլովի Վարիի միջազգային կինոփառատոնի
վավերագրական ֆիլմերի մրցութային ծրագրին: Իսկ մինչ այդ, ինչպես
հունիսի 28-ի ասուլիսում հայտնեց Հայաստանի Կինոգետների եւ
կինոլրագրողների ասոցիացիայի նախագահ Սուսաննա Հարությունյանը,
ֆիլմի` Ռոտերդամում կայացած համաշխարհային պրեմիերայից հետո այն
մասնակցել է Գյոթեբորգի, Թեհրանի, Սիդնեյի, Վաշինգտոնի, Ալբայի,
Դուրբանի եւ «Իզոլա Սինեմա» միջազգային կինոփառատոններին:
Նա նշեց, որ Հարություն Խաչատրյանի «Վավերագրողը» ֆիլմը
2003թ. Կառլովի Վարիի միջազգային կինոփառատոնում արժանացել է
բարձրագույն մրցանակի: «Այս փառատոնն աշխարհում գոյություն ունեցող
Ա կարգի 5 միջազգային փառատոններից մեկն է, որին անգամ միայն
մասնակցելը մեծ հաջողություն է»,- ընդգծեց Սուսաննա
Հարությունյանը:
Նա տեղեկացրեց, որ Կառլովի Վարիի կինոփառատոնում վավերագրական
ֆիլմերի մրցութային ծրագրում ընդգրկված են նաեւ հայտնի ռեժիսորներ
Սերգել Լոզնիցայի (Ռուսաստան), Գալինա Ադամովիչի (Բելառուս),
Մարիլիա Ռոկայի (Բրազիլիա), Մարկո Սկոպի (Սլովակիա), Յոհան
Պալմգերի (Շվեդիա) եւ այլոց ֆիլմերը:
Բացի այդ, աշխարհահռչակ կինոռեժիսոր Միխայիլ Գլավոգերը իր
«Թափառելով հետնախորշերում» ֆիլմով կմասնակցի ե'ւ Կառլովի Վարիի,
ե'ւ «Ոսկե ծիրան» միջազգային փառատոններին: Անվանի ռեժիսորն անձամբ
ներկա է լինելու երկու փառատոններին:
«Պոետի վերադարձը» կինոնկարը առաջիկայում կմասնակցի նաեւ
Էդինբուրգի, Մարսելի, Լոնդոնի, Մելբուռնի, Ռիգայի, Սանկտ
Պետերբուրգի եւ այլ փառատոնների: