ԵՐԵՎԱՆՈՒՄ ԽԻՍՏ ԲԱՐՁՐ ԵՆ ԱՆՊԱՏԱՑՄԱՆ ՌԻՍԿԵՐԸ,- ԳՏՆՈՒՄ ԵՆ
ՄԱՍՆԱԳԵՏՆԵՐԸ
15-06-2006 18:20:00 | Հայաստան | Հասարակություն
ԵՐԵՎԱՆ, 15 ՀՈՒՆԻՍԻ, ՆՈՅՅԱՆ ՏԱՊԱՆ: Հունիսի 16-ին ՄԱԿ-ի
հայաստանյան գրասենյակում տեղի կունենա քննարկում` նվիրված
Անապատացման եւ երաշտի դեմ պայքարի համաշխարհային օրվան: Ինչպես
նշված է «Հանուն կայուն մարդկային զարգացման» ասոցիացիայից «ՆՈՅՅԱՆ
ՏԱՊԱՆ»-ին տրամադրած հաղորդագրությունում, մասնագետ-փորձագետների
կարծիքով, Երեւանում խիստ բարձր են անապատացման ռիսկերը:
Ասոցիացիան ՄԱԿ-ի Շրջակա միջավայրի ծրագրի աջակցությամբ
ներկայումս պատրաստում է Երեւանի էկոլոգիական իրավիճակին նվիրված
զեկույց: Ըստ ասոցիացիայի նախագահ Կարինե Դանիելյանի, վերջին
տարիներին իրականացվող քաղաքաշինական քաղաքականության հետեւանքով
մայրաքաղաքում խիստ բարձրացել են անապատացման ռիսկերը:
Կ.Դանիելյանը նշում է, որ կանաչ տարածքների կտրուկ կրճատումը,
կառուցապատման անընդհատ խտացումը, ավտոտրանսպորտի միջոցների քանակի
աճի հետ մեկտեղ Երեւանը վեր են ածում էկոլոգիական աղետի գոտու:
Պաշտոնական տվյալների համաձայն, վերջին երկու տարիների ընթացքում,
գրեթե ամբողջ գարուն-ամառ-աշուն ժամանակահատվածում, քաղաքում
գրանցվում է ֆոտոքիմիական սմոգ (թունամշուշ):