ՇԱԽՄԱՏԻ ՀԱՄԱՇԽԱՐՀԱՅԻՆ ՕԼԻՄՊԻԱԴԱՅՈՒՄ ԱՌԱՋԻՆ ՏԵՂԸ ԳՐԱՎԱԾ ՀԱՅ
ՇԱԽՄԱՏԻՍՏՆԵՐԸ ՊԱՐԳԵՎԱՏՐՎԵՑԻՆ ԵՐԵՎԱՆԻ ՔԱՂԱՔԱՊԵՏԻ ՊԱՏՎՈԳՐԵՐՈՎ ԵՎ
1000-ԱԿԱՆ ԱՄՆ ԴՈԼԱՐՈՎ
12-06-2006 20:35:00 | Հայաստան | Սպորտ
ԵՐԵՎԱՆ, 12 ՀՈՒՆԻՍԻ, ՆՈՅՅԱՆ ՏԱՊԱՆ: Շախմատի 37-րդ
համաշխարհային օլիմպիադայի ոսկե մեդալին եւ օլիմպիական գավաթին
արժանացած Հայաստանի տղամարդկանց հավաքականի անդամները հունիսի
12-ին պարգեւատրվեցին Երեւանի քաղաքապետի պատվոգրերով,
հուշանվերներով, ինչպես նաեւ 450000-ական դրամ (մոտ 1000 ԱՄՆ
դոլար) դրամական պարգեւներով: Քաղաքապետի պատվոգրերին եւ
հուշանվերների արժանացան նաեւ օլիմպիադայում 8-րդ տեղը գրաված
Հայաստանի կանանց հավաքականի անդամները:
Ինչպես Երեւանի քաղաքապետարանում տեղի ունեցած հանդիսավոր
արարողությանը նշեց քաղաքապետ Երվանդ Զախարյանը, այս հաղթանակին
հայերը երկար են սպասել: «Սա հայ ժողովրդի համար կարեւորագույն
իրադարձություն է: Մենք հպարտ ենք մեր շախմատիստներով, որոնք
միասնական ուժերով հաղթեցին այնպիսի պետությունների
հավաքականներին, ինչպիսիք են ԱՄՆ-ը, Ռուսաստանը, Չինաստանը եւ
այլն: Հուսով եմ, որ հայ շախմատիստները հետագայում էլ կունենան
նման հաղթանակներ»,- նշեց քաղաքապետը:
Հայաստանի Շախմատի ֆեդերացիայի փոխնախագահ, միջազգային
գրոսմայստեր Սմբատ Լպուտյանի խոսքերով, հայ ժողովուրդը բարձր է
գնահատում այս հաղթանակը, քանի որ «սա ոչ միայն մեր, այլեւ
աշխարհասփյուռ հայերի հաղթանակն է»: