ՆԿԱՐԱՀԱՆՎԵԼ Է ԱՐՑԱԽՅԱՆ ՊԱՏԵՐԱԶՄԻ ՄԱՍԻՆ ՊԱՏՄՈՂ ԱՌԱՋԻՆ
ԳԵՂԱՐՎԵՍՏԱԿԱՆ ԿԻՆՈՆԿԱՐԸ
09-06-2006 17:30:00 | Հայաստան | Մշակույթ
ԵՐԵՎԱՆ, 9 ՀՈՒՆԻՍԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ: Արցախյան
պատերազմի տարիներին տեղի ունեցած պատմական իրադարձություններն են
ներկայացված «Ճակատագիր» լիամետրաժ գեղարվեստական ֆիլմում, որի
պրեմիերան կկայանա հունիսի 11-ին Երեւանի «Մոսկվա» կինոթատրոնում:
Ինչպես հունիսի 9-ի ասուլիսում հայտնեց կինոնկարի գլխավոր
դերակատար եւ սցենարի հեղինակ Գոռ Վարդանյանը, մինչ այդ իր
մասնակցությամբ նկարահանված մյուս ֆիլմերից այս մեկն առանձնանում է
իր թեմատիկայով եւ նպատակներով: Նա նշեց, որ սա Արցախյան
ազատամարտի տարիների մասին պատմող առաջին գեղարվեստական կինոնկարն
է: Երեք տարի նախապատրաստական փուլ անցած կինոնկարի սյուժեն
հիմնված է իրական պատմական փաստերի վրա:
Ֆիլմի հերոսները նույնպես իրական կյանքում ունեն իրենց
նախատիպերը: Գլխավոր հերոսը` Գոռը մարմնավորում է հայրենասեր
մարտիկի եւ ազգի պաշտպանի կերպարը: Կրելով ծանր կորուստ` նա իր մեջ
ուժ է գտնում դիմադրելու եւ պայքարելու թշնամու դեմ: Այն թշնամու,
որի հետ նույն բանակի կազմում ինքը մարտնչել է Աֆղանստանում:
Գլխավոր հերոսն ապրում է խորը հոգեբանական դրամա:
Ֆիլմն ունի դաստիարակչական մեծ նշանակություն, հատկապես նոր
սերնդի մեջ հայ մարտիկի եւ ազգային հերոսի կերպարի ձեւավորման
գործում: «Հերոս չեն ծնվում, հերոս դառնում են ժամանակի եւ
հանգամանքների թելադրանքով»,- համոզված է ֆիլմի էքսկլյուզիվ
պրոդյուսեր Հայկ Բաքրջյանը: Ըստ նրա, երիտասարդները ֆիլմի միջոցով
կծանոթանան հայ ազգի ոչ վաղ անցյալի պատմությանը, ազգային
ինքնորոշման գաղափարի ծնունդին, ազգային բանակի կազմավորմանը եւ
տարած հաղթանակներին:
Ֆիլմի նկարահանումներն իրականացվել են Արցախում եւ ԱՄՆ-ում,
այն նկարահանված է հոլիվուդյան ֆիլմերի տարբերակով: Նախնական
փուլում ֆիլմի աշխատակազմը խորհրդակցել եւ աշխատել է Ղարաբաղյան
պատերազմի ականատես եւ մասնակից 200-ից ավելի քաղաքական գործիչների
եւ զինվորականների, այդ թվում գեներալ Սաֆոնովի հետ:
Ֆիլմը հունիսի 12-ից կցուցադրվի երեւանյան կինոթատրոններում,
իսկ հունիսի 13-ին կկայանա կինոնկարի ղարաբաղյան պրեմիերան: