ԹՈՒՐԻՆ, 26 ՄԱՅԻՍԻ, ՆՈՅՅԱՆ ՏԱՊԱՆ: Իտալիայի Թուրին քաղաքում
ընթացող շախմատի 37-րդ համաշխարհային օլիմպիադայում անցկացվեցին
5-րդ տուրի մրցախաղերը:
Տղամարդկանց մրցումներում հանդիպեցին առաջատարները` Հայաստանի
եւ Ռուսաստանի հավաքականները: Լարված մրցապայքարն ավարտվեց ոչ-ոքի`
2-2 հաշվով: Առաջին խաղատախտակի վրա Լեւոն Արոնյանը պարտություն
կրեց Վլադիմիր Կրամնիկից, 2-րդ եւ 3-րդ խաղատախտակների վրա ոչ-ոքի
ավարտվեցին Վլադիմիր Հակոբյան-Պյոտր Սվիդլեր, Կարեն
Ասրյան-Ալեքսանդր Գրիշչուկ պարտիաները, իսկ 4-րդ խաղատախտակի վրա
Գաբրիել Սարգսյանը հաղթեց Ալեքսանդր Մորոզեւիչին: 5-րդ տուրից հետո
մրցաշարային աղյուսակը գլխավորում են Հայաստանի եւ Ռուսաստանի
շախմատիստները, որոնք 20 հնարավորից 15,5-ական միավոր են վաստակել:
3-րդ տեղում է Հոլանդիայի հավաքականը 15 միավորով:
Հայաստանի կանանց հավաքականը 5-րդ տուրում 2,5-0,5 հաշվով
պարտության մատնեց Հունաստանի շախմատիստուհիներին: Լիլիթ Մկրտչյանը
ոչ-ոքի խաղաց, իսկ Էլինա Դանիելյանը եւ Սիրանուշ Անդրեասյանը
հաղթեցին իրենց մրցակցուհիներին: Այս հաղթանակից հետո Հայաստանի
հավաքականը 15 հնարավորից վաստակել է 11 միավոր եւ բաժանում է
4-11-րդ տեղերը: Առջեւում են Ռուսաստանի (12,5 միավոր), Ուկրաինայի
(12) եւ Հունգարիայի (11,5) շախմատիստուհիները:
Մայիսի 26-ին օլիմպիադայի մասնակիցները հանգստանում են: Իսկ
հաջորդ օրը կայանալիք 6-րդ տուրում Հայաստանի տղամարդիկ կմրցեն
Ուզբեկստանի, իսկ կանայք` Ռումինիայի թիմերի հետ: