ԵՐԵՎԱՆ, 19 ՄԱՅԻՍԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ: Դեն Բրաունի «Դա Վինչիի ծածկագիրը» գրքին եւ վերջինի հիման վրա նկարահանված նույնանուն ֆիլմին էր վերաբերում մայիսի 19-ին Հայ Առաքելական եկեղեցու Արարատյան հայրապետական թեմի առաջնորդարանում կայացած քննարկումը, որին մասնակցում էին հոգեւոր հայրեր, մտավորականներ, երիտասարդներ եւ հավատացյալներ: Ներկաների համոզմամբ, գիրքը եւ ֆիլմը իրենց բովանդակությամբ հակասում են Սուրբ Գրքով եւ եկեղեցու սրբազան ավանդությամբ բյուրեղացված ուղղափառ վարդապետությանը` խեղաթյուրելով քրիստոնեական ճշմարտությունները: Ինչպես նշեցին քննարկման մասնակիցները, Կաննի կինոփառատոնի արտամրցութային ծրագրում ցուցադրված կինոնկարն արժանացել է քրիստոնեական աշխարհի սուր քննադատությանը: Որոշ երկրներ, այդ թվում Հնդկաստանի կառավարությունը, արգելել են կինոնկարի ցուցադրությունը կինոթատրոններում: Բացի այդ, կինոնկարը որպես արվեստի գործ արժանացել է եվրոպական եւ ամերիկյան կինոքննադատների բացասական գնահատականներին: Այս կապակցությամբ, մայիսի 18-ին Հայ Առաքելական եկեղեցին հանդես է եկել հայտարարությամբ, որով դատապարտում է քրիստոնեական հավատքի ու սրբությունների հանդեպ այդ մեծ անարգանքը, որ վիրավորում է քրիստոնյա հավատացյալների կրոնական զգացմունքները եւ մարդկային արժանապատվությունը: Հակոբ քահանա Խաչատրյանը եւ Տաճատ ավագ քահանա Դավիդյանը միանշանակորեն համոզված են, որ ե'ւ գիրքը, ե'ւ կինոնկարը աստվածհայհոյություն է եւ սրբապղծություն է քրիստոնեական արժեքների եւ վարդապետության նկատմամբ: Այնուհանդերձ, երկու քահանաները տարակարծիք էին կինոնկարի ցուցադրությունն արգելելու հարցում: Ի տարբերություն տեր Հակոբի, որը կտրականապես դեմ էր ֆիլմի ցուցադրությանը, տեր Տաճատը գտնում է, որ «կինոնկարի նկատմամբ հակաքարոզչություն կարելի է տանել անգամ ցուցադրության ընթացքում` կինոդահլիճների մուտքերի մոտ տարբեր ակցիաներ կազմակերպելով. օրինակ, բաժանել քրիստոնեական գրքույկներ կամ քարոզել հենց տեղում»: Տեր Տաճատի խոսքերով, Ամերիկայում խստորեն քննադատվել է կինոնկարը, սակայն չի արգելվել ցուցադրությունը` ելնելով այն պարզ ճշմարտությունից, որ արգելքը ավելի է շարժում հետաքրքրությունը: Տեր Հակոբը համոզված է, որ կան երեւույթներ, որոնց նկատմամբ ցանկացած այլակարծություն սրբապղծություն է, ինչպես «Դա Վինչիի ծածկագիրը» եւ նմանօրինակ այլ բաներ: Ըստ նրա, այս կինոնկարը հետապնդում է մեկ նպատակ` կասկածի տակ առնել Քրիստոսի Աստվածությունը եւ նրա զորավոր վարդապետությունը:

---