ՀԵՏԱՁԳՎԵԼ ԵՆ ՀՀ ՖՈՒՏԲՈԼԻ ԲԱՐՁՐԱԳՈՒՅՆ ԽՄԲԻ ԱՌԱՋՆՈՒԹՅԱՆ
ՉՈՐՐՈՐԴ ՄՐՑԱՓՈՒԼԻ ՀԱՆԴԻՊՈՒՄՆԵՐԸ
04-05-2006 17:45:00 | Հայաստան | Սպորտ
ԵՐԵՎԱՆ, 4 ՄԱՅԻՍԻ, ՆՈՅՅԱՆ ՏԱՊԱՆ: ՀՀ ֆուտբոլի բարձրագույն
խմբի Առաջնության չորրորդ մրցափուլի հանդիպումները, որոնք
նախատեսված էին մայիսի 5-ին եւ 6-ին, հետաձգվել են: Այսպիսի
որոշում է ընդունել Հայաստանի ֆուտբոլի ֆեդերացիայի
ղեկավարությունը` նկատի առնելով, որ «Արմավիա» ընկերության Ա-320
ինքնաթիռի վթարի կապակցությամբ մայիսի 5-ը եւ 6-ը
հանրապետությունում հայտարարված են սգո օրեր:
Ինչպես «ՆՈՅՅԱՆ ՏԱՊԱՆ»-ին հայտնեցին Հայաստանի ֆուտբոլի
ֆեդերացիայի Մամուլի քարտուղարությունից, մայիսի 5-ին նշանակված
«Գանձասար» - «Արարատ» եւ մայիսի 6-ին նշանակված «Ուլիս» - «Շիրակ»
հանդիպումները կկայանան մայիսի 7-ին, ժամը 17-ին: Թիմերի
ֆուտբոլիստները խաղադաշտ դուրս կգան սեւ թեւկապներով:
Մայիսի 5-ին նշանակված «Կիլիկիա» - «Փյունիկ» եւ «Բանանց» -
«Միկա» հանդիպումները կկայանան հունիսի 3-ից 5-ը ընկած
ժամանակահատվածում: