ԵՐԵՎԱՆԻ ԳԵՂԱՐՎԵՍՏԻ ԱԿԱԴԵՄԻԱՅԻ ՊԱՏԿԵՐԱՍՐԱՀՈՒՄ ԲԱՑՎԵՑ «ԲԱՏԻԿ»
ԽՈՐԱԳՐՈՎ ՑՈՒՑԱՀԱՆԴԵՍԸ
02-05-2006 15:20:00 | Հայաստան | Մշակույթ
ԵՐԵՎԱՆ, 2 ՄԱՅԻՍԻ, ՆՈՅՅԱՆ ՏԱՊԱՆ: Երեւանի Գեղարվեստի
ակադեմիայի պատկերասրահում մայիսի 2-ին բացվեց երիտասարդ
նկարչուհիներ Տաթեւիկ Նալբանդյանի, Հասմիկ Գրիգորյանի եւ Ասյա
Ղազարյանի «Բատիկ» խորագրով ցուցահանդեսը: Սա նկարչուհիների առաջին
անհատական ցուցահանդեսն է, որտեղ ներկայացված են նրանց ոչ միայն
գեղանկարչական աշխատանքները, այլ նաեւ մետաքսից պատրաստված շալեր,
մոմակալներ եւ այլն:
Ինչպես ցուցահանդեսի բացմանը նշեց արվեստաբան Շուշան
Ռշտունին, Գեղարվեստի ակադեմիայում բատիկի հիմքերը դրված են բարձր
մակարդակի վրա: Ըստ նրա, բատիկը` մետաքսի վրա մեղրամոմով արված
աշխատանքների արվեստը, ծնունդ է առել Ինդոնեզիայում, եւ զարգացած է
նաեւ Հնդկաստանում, Ճապոնիայում եւ Չինաստանում: Շ.Ռշտունու
խոսքերով, արվեստի այս տեսակը աստիճանաբար մտնում է նաեւ հայկական
կերպարվեստի մեջ, որտեղ օգտագործվում են հայկական զարդանախշեր,
ժայռապատկերներ, որմնանկարներ եւ այլն:
Ըստ ակադեմիայի ռեկտոր Արամ Իսաբեկյանի, այսօր շատ
երիտասարդներ զբաղվում են բատիկայով, եւ դա հիմք կհանդիսանա,
որպեսզի հետագայում ձեւավորվի նաեւ հայկական բատիկան: