ԲԱՔՈՒ, 21 ԱՊՐԻԼԻ, ՆՈՅՅԱՆ ՏԱՊԱՆ: Հայաստանի արտաքին գործերի նախարար Վ.Օսկանյանի վերջին հայտարարությունները կառուցողական են եւ ցուցադրում են հավատարմություն խաղաղ բանակցությունների գործընթացին: Այս մասին «Թրենդին» հայտնել է Ադրբեջանի ԱԳՆ տեղեկատվության եւ մամուլի վարչության պետ Թայիր Թաղիզադեն: Խոսքը վերաբերում է Վ.Օսկանյանի այն հայտարարությանը, որ «եթե Ադրբեջանը ընդունում է ԼՂ ժողովրդի ինքնորոշման իրավունքը, որ նրանք հնարավորություն ունենան իրենք որոշելու, թե ինչպիսի կարգավիճակ պետք է ունենան, այդ դեպքում` այո, Հայաստանը պատրաստ է լրջորեն քննարկելու պատերազմի հետեւանքների վերացման խնդիրները»: «Այս հայտարարությունը վկայում է, որ հայկական կողմը մտադիր է ակտիվորեն մասնակցել ղարաբաղյան հակամարտության կարգավորման խաղաղ բանակցությունների գործընթացին,- ասել է Թ.Թաղիզադեն:- Փաստացի այդ հայտարարությունը «փուլային» լուծմանը հայկական կողմի նվիրվածության հաստատումն է: Ինչպես հայտնի է, «փուլային» տարբերակի համաձայն, առաջին փուլում պետք է լուծվի Լեռնային Ղարաբաղի շրջակա շրջաններից Հայաստանի զինված ուժերի դուրսբերման հարցը: Այստեղ կան նաեւ բազում այլ ուղեկից տարրեր, ներառյալ` ականազերծում, հաղորդակցությունների վերականգնում, տեղահանված անձանց վերադարձ, նրանց անվտանգության ապահովում: Իսկ երկրորդ փուլը` Լեռնային Ղարաբաղի կարգավիճակի որոշում»: Ինչ վերաբերում է ինքնորոշմանը, ապա, ըստ Թ.Թաղիզադեի, այն միանգամայն հնարավոր է եւ պետության կազմում: «Դա հենց այն ամենաբարձր ինքնավարության կարգավիճակն է, որի մասին մենք ասում ենք: Այսպիսով, դա կարելի է գնահատել որպես խաղաղ բանակցությունների գործընթացին հայկական կողմի նվիրվածության հաստատում եւ այն բանի գիտակցում, թե որոնք են Հայաստանի ազգային շահերը»,- ամփոփել է նա:

---